Жаңбыр, дауыл және 40 градустық ыстық: 22 маусымға арналған ауа райы болжамы
Қазақстанның бірнеше өңірінде дауылды ескерту жарияланды.
SMARTNEWS.KZ басылымының хабарлауынша, «Қазгидромет» 22 маусымға бірқатар өңірде дауылды ескерту жариялады. Мамандар кей аймақтарда қатты жаңбыр, найзағай, бұршақ пен дауыл күтілетінін, ал оңтүстік және орталық өңірлерде аптап ыстық пен жоғары өрт қаупі сақталатынын хабарлады.
Атырау, Маңғыстау және Батыс Қазақстан облыстарында ауа райы күрделенеді. Атырау облысының батысында, солтүстігінде және шығысында жаңбыр, найзағай, бұршақ пен дауыл күтіледі. Желдің бағыты солтүстік-батыстан оңтүстік-батысқа ауысып, екпіні секундына 15-20 метрге дейін жетуі мүмкін. Облыс аумағында жоғары өрт қаупі сақталады.
Маңғыстау облысының батысында, оңтүстігінде және орталығында жаңбыр мен найзағай болжанады. Жел екпіні де күшейіп, секундына 15-20 метрге дейін жетеді. Ақтау қаласында да кей уақытта жаңбыр мен найзағай күтіледі.
Батыс Қазақстан облысында жауын-шашын күшейіп, кей жерлерде бұршақ пен дауыл болуы ықтимал. Желдің жылдамдығы секундына 20 метрге дейін жетеді. Орал қаласында жаңбыр, найзағай, бұршақ және дауыл күтіледі.
Ақмола облысында күндіз ауа температурасы 35-38 градусқа дейін көтеріледі. Кей аудандарда жаңбыр мен найзағай болжанады. Өңірдің кей бөліктерінде жоғары және төтенше өрт қаупі сақталады.
Сондай-ақ Қарағанды, Ұлытау, Шығыс Қазақстан, Абай, Солтүстік Қазақстан, Ақтөбе, Қостанай, Түркістан, Алматы, Қызылорда, Жамбыл, Жетісу және Павлодар облыстарында түрлі деңгейдегі қолайсыз ауа райы күтіледі.
Ең жоғары температура Қызылорда облысында тіркелуі мүмкін: күндіз ауа температурасы 40-42 градусқа дейін жетеді. Павлодар, Ұлытау және кей оңтүстік өңірлерде 41 градусқа дейінгі аптап ыстық болжанып отыр.
Синоптиктер азаматтарды ауа райы жағдайын бақылауға, қатты жел кезінде қауіпсіздік талаптарын сақтауға және өрт қаупі жоғары аймақтарда барынша сақ болуға шақырды.
Материал авторы
