Венесуэладағы жойқын жер сілкінісінен қаза тапқандар саны 1,5 мыңға жақындады
Қираған ғимараттардың астында қалған адамдарды іздеу жұмыстары тоқтаусыз жүргізілуде.
SMARTNEWS.KZ басылымының хабарлауынша, Венесуэлада болған екі күшті жер сілкінісінен кейін қаза тапқандар саны 1 450 адамға жетті. Құтқарушылар ондаған қираған ғимараттың үйінділерін тәулік бойы тексеріп жатыр. Бұл туралы Reuters агенттігі жазды.
Венесуэла Ұлттық ассамблеясының төрағасы Хорхе Родригестің айтуынша, қазіргі таңда 1 450 адамның қаза болғаны ресми түрде расталған. Тағы 3 150 тұрғын зардап шеккендер қатарында.
Табиғи апат салдарынан ел аумағында 774 ғимарат толығымен қираған.
Алайда Венесуэла оппозициясына жақын ақпарат көздері апаттың нақты ауқымы әлдеқайда үлкен болуы мүмкін екенін мәлімдеді. Олардың дерегінше, 28 маусымдағы жағдай бойынша шамамен 50 мың адам із-түзсіз жоғалғандар тізімінде тұр.
Ел билігі мектептердегі сабақты тағы бір аптаға тоқтатты. Венесуэла президентінің міндетін атқарушы Дельси Родригес іздеу-құтқару жұмыстары бір сәтке де тоқтамағанын айтты.
Демалыс күндері құтқарушылар үйінді астынан бірнеше адамды, оның ішінде кішкентай баласы бар ер адамды тірі алып шыққан.
«Адамдарды табу мүмкіндігі әлі де бар. Құтқарушылар тұрғын үйлердің қирандылары арасынан аман қалғандарды іздеуді жалғастырып жатыр», – деді Дельси Родригес.
Сонымен қатар халықаралық сарапшылардың болжамы әзірге көңіл көншітпейді. АҚШ Геологиялық қызметінің (USGS) бағалауынша, бұл жер сілкінісі соңғы онжылдықтардағы Латын Америкасындағы ең қуатты апаттардың бірі болған.
Мамандар соңғы құрбандар саны 10 мыңнан асып кетуі мүмкін екенін жоққа шығармайды.
Материал авторы
