Дауыл, бұршақ, аптап ыстық: Қазақстан өңірлерінде қауіпті ауа райы күтіледі

SMARTNEWS.KZ басылымының хабарлауынша, Қазақстанның бірқатар өңірінде қолайсыз ауа райына байланысты дауылды ескерту жарияланды. 30 маусымда бірнеше облыста жаңбыр, найзағай, бұршақ, дауыл және қатты жел күтіледі. Бұл туралы «Қазгидромет» мәліметіне сүйеніп хабарланды.

Синоптиктердің болжамынша, ауа райының күрделенуі елдің көптеген аймағын қамтиды. Кей өңірлерде желдің жылдамдығы секундына 15-20 метрге дейін күшейіп, жекелеген аудандарда екпіні 25 метрге жетуі мүмкін.

Қостанай, Ақмола, Павлодар, Солтүстік Қазақстан, Батыс Қазақстан және Ақтөбе облыстарында жаңбыр, найзағай, бұршақ пен дауыл болжанады. Бірқатар ауданда тұман түсіп, жел күшейеді. Сонымен қатар кей аумақтарда жоғары және төтенше өрт қаупі сақталады.

Атырау облысында түнгі уақытта жаңбыр мен найзағай, кей жерлерде қатты жауын-шашын, бұршақ және дауыл күтіледі. Өңірдің кей бөлігінде желдің екпіні секундына 20 метрге дейін жетеді. Атырау қаласында да жаңбыр мен қатты жел болжанған.

Түркістан, Жамбыл және Жетісу облыстарында таулы және тау бөктерлі аймақтарда өткінші жаңбыр, найзағай, бұршақ және дауыл болуы мүмкін. Сонымен қатар бұл өңірлерде ауа температурасы 35-37 градусқа дейін көтеріліп, өрт қаупі сақталады.

Алматы облысында күндіз өткінші жаңбыр, найзағай күтіледі. Солтүстік бөліктерде шаңды дауыл болуы ықтимал. Алматы қаласында да күндіз жаңбыр мен найзағай, желдің күшеюі болжанған.

Шығыс Қазақстан мен Абай облыстарында да ауа райы тұрақсыз болады. Бұл өңірлерде жаңбыр, найзағай, бұршақ күтіліп, желдің екпіні кей жерлерде секундына 23 метрге дейін жетуі мүмкін. Сонымен қатар күндіз ауа температурасы 35-38 градусқа дейін көтеріледі.

Қызылорда облысында желдің күшеюі күтіледі. Кей аудандарда жаңбыр, найзағай және дауыл болжанады. Өңірдің оңтүстігі мен орталығында төтенше өрт қаупі сақталады.

Астанада 30 маусымда күндіз жаңбыр, найзағай және бұршақ күтіледі. Оңтүстік-батыстан соғатын желдің екпіні секундына 15-20 метрге жетуі мүмкін.

Мамандар қолайсыз ауа райы кезінде тұрғындарға сақтық шараларын сақтауға, қатты жел кезінде сырттағы заттарды бекітуге және өрт қауіпі жоғары аймақтарда қауіпсіздік талаптарын бұзбауға кеңес береді.