Шілде дауылмен басталады: 20-дан астам аймақта ауа райы күрделенеді
Қазақстанның бірқатар өңірінде дауылды ескерту жарияланды.
SMARTNEWS.KZ басылымының хабарлауынша, 1 шілдеде Қазақстанның көптеген аймағында қолайсыз ауа райы күтіледі. Синоптиктер жаңбыр, найзағай, бұршақ, дауыл және қатты жел болатынын ескертіп, бірқатар облыста дауылды ескерту жариялады.
«Қазгидромет» мәліметінше, ауа райының күрделенуі еліміздің батысынан шығысына дейінгі бірқатар өңірді қамтиды.
Маңғыстау облысында жаңбыр, найзағай, кей жерлерде қатты жаңбыр, бұршақ пен дауыл күтіледі. Солтүстік-батыстан соғатын желдің жылдамдығы секундына 23-28 метрге дейін жетуі мүмкін. Ақтау қаласында да жаңбыр мен қатты жел болжанып отыр.
Ақтөбе, Батыс Қазақстан, Атырау және Қызылорда облыстарында да жаңбыр, найзағай және желдің күшеюі күтіледі. Кей өңірлерде тұман түсіп, желдің екпіні секундына 20 метрге дейін жетеді.
Солтүстік және орталық аймақтарда да ауа райы тұрақсыз болады. Ақмола, Солтүстік Қазақстан, Қостанай, Павлодар және Қарағанды облыстарында бұршақ, дауыл, қатты жаңбыр болуы ықтимал.
Алматы облысында таулы аудандарда қатты жаңбыр, бұршақ және дауыл күтіледі. Сонымен қатар облыстың кей бөлігінде шаңды дауыл болуы мүмкін. Алматы қаласында күндіз жаңбыр, найзағай және бұршақ болжанып отыр.
Шығыс Қазақстан, Абай, Жетісу, Түркістан және Жамбыл облыстарында да өткінші жаңбыр, найзағай, дауыл және қатты жел күтіледі. Кей жерлерде желдің жылдамдығы секундына 25-28 метрге дейін жетуі мүмкін.
Астанада 1 шілдеде кей уақыттарда жаңбыр, найзағай, күндіз бұршақ пен дауыл күтіледі. Желдің екпіні секундына 15-20 метрге дейін күшейеді.
Сонымен қатар бірқатар өңірде жоғары және төтенше өрт қаупі сақталады. Мамандар тұрғындарға ауа райы құбылған кезде қауіпсіздік талаптарын сақтауға кеңес береді.
Материал авторы
