Мексикада әлем чемпионатындағы жеңісті тойлау төрт адамның өлімімен аяқталды
Құтқару қызметтері оқиға орнына жедел жеткенімен, марқұмдарды аман алып қалу мүмкін болмады.
SMARTNEWS.KZ басылымының хабарлауынша, Мексика құрамасының футболдан әлем чемпионатында Эквадорды жеңгеннен кейін ел астанасы Мехикода өткен жаппай мерекелеу қайғылы оқиғамен аяқталды. Салдарынан төрт адам көз жұмды. Бұл туралы Associated Press агенттігі хабарлады.
Мехико қаласының Денсаулық сақтау хатшылығының мәліметінше, «Тәуелсіздік періштесі» монументі маңында 48, 44 және 19 жастағы екі әйел мен бір ер адам ес-түссіз күйде табылған. Сол кеште бұл жерге ұлттық құраманың жеңісін тойлау үшін мыңдаған адам жиналған.
Биліктің алдын ала дерегіне сәйкес, олардың үшеуі тұншығу салдарынан қайтыс болған.
Кейінірек Мехико қаласының денсаулық сақтау мәселелері жөніндегі хатшысы Надин Гасман тағы бір адамның қаза тапқанын хабарлады. Шамамен 30 жастағы ер адам эпилепсия ұстамасы, құрысу және асқазан-ішек жолынан қан кету белгілерімен ауруханаға жеткізілген. Алайда дәрігерлер оның өмірін сақтап қала алмады. Ол жүрек пен тыныс алудың тоқтауынан көз жұмған.
Мехико мэрі Клара Бругада құтқару қызметтері үш адамның ес-түссіз жатқаны туралы хабар түскен бойда оқиға орнына жедел жеткенін айтты. Алайда медицина қызметкерлері келген кезде олар қайтыс болып кеткен.
Оқиғаның нақты мән-жайы анықталып жатыр.
Материал авторы
