Трамптың Иранға шабуылын сынаған офицерге қатысты іс қозғалды
АҚШ заңдары әскери қызметкерлердің саяси мәлімдемелеріне қатаң шектеу қоймақ.
SMARTNEWS.KZ басылымының хабарлауынша, АҚШ Әскери-әуе күштері (ӘӘК) 1 шілдеде Капитолий ғимараты алдында өткен наразылық акциясында президент Дональд Трамп пен вице-президент Джей Ди Вэнске импичмент жариялауға шақырған қызметтегі офицерге қатысты тергеу басталғанын мәлімдеді. Бұл туралы Reuters агенттігі жазды.
Әлеуметтік желілерде тараған видеоларда АҚШ ӘӘК майоры Джейсон Уотсон Дональд Трамп пен Джей Ди Вэнсті, соның ішінде Конгрестің рұқсатынсыз Иранға қарсы әскери әрекеттер бастағаны үшін сынға алғаны көрінеді.
Кейін Капитолий полициясы қолында президент пен вице-президентті қызметінен шеттетуге және оларға импичмент жариялауға үндеген плакаты бар офицерді ұстаған.
АҚШ ӘӘК министрі Трой Майнктің кеңсесі оқиғаны растап, тергеудің толық көлемде жүргізілетінін мәлімдеді.
«Министрлік кез келген құқыққа қайшы әрекет туралы мәліметке, әсіресе Қарулы күштердің саяси бейтараптығына нұқсан келтіруі мүмкін жағдайларға ерекше мән береді», – делінген ведомствоның X әлеуметтік желісіндегі ресми хабарламасында.
АҚШ заңнамасы әскери қызметкерлердің саяси қызметіне қатаң шектеу қояды. Әскери әділеттің бірыңғай кодексінің 88-бабына сәйкес, офицерлерге президент, вице-президент, Конгресс және өзге де мемлекеттік билік өкілдері туралы кемсітетін немесе қорлайтын мәлімдеме жасауға тыйым салынған.
Өз сөзінде майор Джейсон Уотсон мұндай әрекеттің салдарын түсінетінін де айтты.
«Мен айтқым келген сөз өзімнен де маңызды. Оны айту үшін қандай құн төлеуге дайын екенім де маңызды емес», – деді ол.
Материал авторы
