АҚШ шабуылынан кейін Ормуз бұғазында теңіз тасымалы күрт төмендеді
АҚШ пен Иран арасындағы жаңа шиеленіс әлемдік мұнай нарығына қауіп төндірді.
Ормуз бұғазындағы теңіз тасымалы АҚШ-тың Иранға қарсы әскери іс-қимылдарын қайта бастағаннан кейін ең төменгі деңгейге дейін қысқарды. Бұл туралы Bloomberg агенттігі кеме қозғалысын бақылайтын сервистердің деректеріне сілтеме жасап жазды.
Қазіргі уақытта коммерциялық кемелердің қозғалысы бұғаздың тек солтүстік бөлігінде ғана байқалады. Бұл – Тегеран мақұлдаған солтүстік теңіз дәлізі. Ал бұғаздың оңтүстік бөлігіндегі Оман дәлізінде кеме қозғалысы мүлде тіркелмеген.
Bloomberg жариялаған мәліметке сәйкес, материал жарияланған сәтте бұғаз арқылы тек екі ірі кеме жүрген. Оның бірі – АҚШ санкциясына іліккен супертанкер, екіншісі – Иран туы астында жүзетін контейнер тасымалдаушы кеме. Агенттік транспондерлерін өшіріп алған өзге кемелердің де қозғалып жүруі мүмкін екенін жоққа шығармайды.
Шиеленістің қайта өршуіне 7 шілдеде АҚШ пен Иран арасындағы бітімнің бұзылуы себеп болды. Алдымен Ормуз бұғазында екі мұнай танкеріне шабуыл жасалды. Осыдан кейін Катар мен Сауд Арабиясы шабуылға Иранды айыптады.
Оқиғадан соң АҚШ президенті Дональд Трамп атысты тоқтату режимінің күшін жойғанын жариялап, америкалық әскери күштер Иран аумағына бірнеше соққы жасағанын мәлімдеді.
8 шілдеде Анкарада өткен НАТО саммитінде Дональд Трамп Тегеранға Иран порттарын қайтадан бұғаттауы мүмкін екенін ескерткен.
Материал авторы
