Жарты жылда мемлекеттік қазынаға 8,5 трлн теңге түскен

SMARTNEWS.KZ басылымының хабарлауынша, биылғы жылдың алғашқы алты айының қорытындысы бойынша республикалық бюджеттің кіріс бөлігі толық көлемде орындалды. Сонымен қатар мемлекет өзіне алған барлық әлеуметтік міндеттемелерді уақытылы қаржыландырды. Бұл туралы Үкімет отырысында қаржы вице-министрі Ержан Біржанов мәлімдеді.

Вице-министрдің айтуынша, трансферттерді есепке алмағанда республикалық бюджеттің кірісі 8,5 трлн теңгеге жетіп, жоспар 100,6 пайызға орындалған. Бұл өткен жылдың сәйкес кезеңімен салыстырғанда 1,7 трлн теңгеге немесе 24,6 пайызға артық.

Салықтық түсімдер де жоспардан жоғары орындалды. Бірінші жартыжылдықта бюджетке 8,3 трлн теңге салық түсті, бұл жоспардың 100,3 пайызына тең. Өткен жылдың осы кезеңімен салыстырғанда салық түсімдері 29 пайызға немесе 1,9 трлн теңгеден астам сомаға көбейген.

Ержан Біржановтың сөзінше, бюджет кірісінің өсуіне әлемдік нарықтағы негізгі экспорттық тауарлар бағасының қымбаттауы мен сыртқы сауда белсенділігінің артуы оң әсер еткен.

Сонымен қатар электрондық шот-фактуралар жүйесі арқылы тіркелген сату айналымы 12 пайызға өсіп, 10,8 трлн теңгеге жеткен. Бұл да бюджетке түсетін кірістің ұлғаюына ықпал еткен негізгі факторлардың бірі болды.