RUS
Ақтөбе облыстық Табиғи ресурстар және табиғатты қорғау басқармасы арқылы 1200 жас орман шаруашылығына барады. Онда көгалдандыру жұмыстарын жасайды. Ал 800-і абаттандыру және құрылыс саласына бағытталады.
«Биыл жастардың жалақысы өсті. Былтыр 100 мың теңге алса, биыл 120-130 мың теңге еңбекақы беріледі. Бұл жастардың жұмысына байланысты берілетін жалақы көлемі. Негізі 16-35 жас аралығындағы жастар еңбекке араласа алады. Мектеп оқушылары ата-анасының рұқсатын алуы тиіс. Жастардан жеке куәлік көшірмесе, 075 анықтамасы мен жұмыссыздығын растайтын құжат сұралады», - деді «Жасыл ел» жастар еңбек жасақтары және «Атамекен» студенттер отрядтары қоғамдық бірлестігінің төрағасы Нұржан Шаңғытбаев.
Қазіргі кезде жастардың алғашқы легі еңбегін бастап кетті. Жалпы 200-ден астам жас орман шаруашылығындағы жұмысқа тартылды. Ал 100-ден астамы қаланы абаттандыруға үлес қосып жүр.
«Көгалдандыру жұмыстарына тартылған жастар қазір Мағаджан тәлімбағында ағаш суарып, арамшөбін жұлады. Сонымен бірге бір бөлігі тасжол жиегіндегі құмды жинау, қоқыс жинау, талдарды әкетуге жұмылдырылады. Жол белгілерін де сырлайды», - деді «Жасыл ел» жастар еңбек жасақтары және «Атамекен» студенттер отрядтары қоғамдық бірлестігінің төрағасы Нұржан Шаңғытбаев.
«Таза қала» акциясы аясында өзен жағасы да тазаланады. Бұл – апта сайын атқарылатын жұмыс. «Менің атаулы ағашым» акциясы көктемде ұйымдастырылды. «Ардагерлерімізді ардақтайық» акциясы аясында зейнеткерлерге көмектесу жолы қарастырылған.
Айта кетейік, толық емес, көпбалалы және әлеуметтік жағынан аз қамтылған отбасыларда тәрбиеленіп отырған 100 бала күзде елордаға жолдама алады.