БҚО-да тұрғындар аударылған фурадан төгілген 20 тонна нектаринді бір сағатта жинап алған

SMARTNEWS.KZ басылымының хабарлауынша, Батыс Қазақстан облысында жол апатынан кейін күтпеген жағдай орын алды. Самара–Шымкент тасжолында нектарин тиеген жүк көлігі аударылып, көліктен шашылған жемістерді жергілікті тұрғындар жаппай жинап әкеткен. Бұл туралы Astana TV жеткізді.

Оқиға Бәйтерек ауданында болған. Жол апатынан кейін фурадағы ондаған тонна нектарин жол жиегіне төгілген.

Куәгерлердің айтуынша, жүргізуші бірнеше күн бойы көмек күткенімен, эвакуатор келмеген. Осыдан кейін ол бүлінбей қалған жемістерді жергілікті тұрғындарға тегін алып кетуге рұқсат берген.

Оқиға орнына ондаған ауыл тұрғыны жиналған. Куәгерлердің сөзінше, адамдар бір сағатқа жетпейтін уақытта шамамен 20 тонна нектаринді жинап алған.

Алайда жемісті бөлісу тыныш өтпеген. Кейбір адамдар арасында дау туып, итерісу мен жанжал болған.

Жергілікті тұрғын Равхат Халелов мұндай жағдайдың алдын алуға болар еді деп есептейді.

Оның айтуынша, жол бойындағы мұндай жағдайларда адамдар сабыр сақтап, бір-біріне құрметпен қарауы керек болған.

«Жүргізушінің өзі адамдарға шашылған жемісті алуға мүмкіндік берді. Мұндайда аздап ұят пен сабыр танытып, талассыз алуға болатын еді. Бірақ оның орнына адамдар итерісіп, нектариндерді бір-бірінің қолынан жұлып жатты», – деді ол.

Тұрғындар сонымен қатар бұл жол бөлігінің апатты аймақ саналатынын айтып, жауапты органдардан қауіпсіздік шараларын күшейтуді сұрады.

Жол апаты кейде тек көлік пен жүктің мәселесі емес, адамның қиын сәттегі мінезін де көрсетеді. Біреуге бұл жай ғана тегін жеміс болып көрінсе, енді біреуге ол қоғамдағы тәртіп пен мәдениеттің сынағы болды.