Қазақстанның басым бөлігінде аптап ыстық пен бұршақ күтіледі

SMARTNEWS.KZ басылымының хабарлауынша, 20 шілдеде Қазақстанның көптеген өңірінде ауа райы күрт құбылып, найзағай, нөсер жаңбыр, бұршақ, дауылды жел және аптап ыстық күтіледі. Бірқатар облыста желдің екпіні секундына 23-28 метрге дейін жетсе, оңтүстік өңірлерде ауа температурасы +44 градусқа дейін көтеріледі. Бұл туралы «Қазгидромет» РМК мәліметіне сүйене отырып хабарлаймыз.

Елдің батысындағы Атырау, Маңғыстау, Ақтөбе және Батыс Қазақстан облыстарында жаңбыр, найзағай, бұршақ және екпінді жел болжанып отыр. Маңғыстау облысының оңтүстігінде ауа температурасы +40 градусқа дейін көтерілсе, өңірдің солтүстік-шығысында төтенше өрт қаупі сақталады.

Ақмола, Қостанай, Солтүстік Қазақстан, Павлодар және Абай облыстарында қатты жаңбыр, найзағай, бұршақ және дауыл болады. Кей жерлерде желдің екпіні 28 м/с-қа дейін күшейеді. Астана қаласында да күндіз жаңбыр, найзағай, бұршақ және қатты жел күтіледі.

Шығыс Қазақстан мен Абай облыстарында күндізгі ауа температурасы +35...+38 градусқа дейін көтеріліп, найзағаймен қатар бұршақ пен дауыл болуы ықтимал.

Қарағанды және Ұлытау облыстарында +35...+38 градусқа дейінгі қатты ыстық сақталады. Сонымен қатар өңірлерде жоғары және төтенше өрт қаупі жарияланған.

Түркістан облысында және Шымкент пен Түркістан қалаларында күндіз +40...+44 градусқа дейін аптап ыстық болады. Облыстың солтүстігінде шаңды дауыл күтіледі. Аймақта төтенше өрт қаупі сақталып отыр.

Қызылорда облысының солтүстігі мен орталығында шаңды дауыл болжанса, өңір бойынша төтенше өрт қаупі күшінде қалады.

Жетісу облысында Алакөл көлдері ауданында желдің екпіні 23-28 м/с-қа дейін күшейеді.

Синоптиктер тұрғындарды ауа райының күрт өзгеруіне байланысты сақтық шараларын сақтауға, алыс жолға шыққанда және табиғат аясында демалғанда қауіпсіздік талаптарын қатаң ұстануға шақырады. Әсіресе өрт қаупі жоғары және төтенше деңгейдегі өңірлерде отты абайсыз пайдаланбау қажет.