RUS
Бұл туралы «Ашық» НҚА порталында жарияланған Қоғаммен әріптестікте қоғамдық қауіпсіздікті қамтамасыз етудің 2024-2028 жылдарға арналған тұжырымдамасында жазылған, деп хабарлайды smartnews.kz сайты.
«Қазақстандағы қылмыстың динамикасына, құрылымына және деңгейіне қатысты қылмыстық-құқықтық статистиканы талдау соңғы 5 жыл ішінде елде қылмыстық құқық бұзушылықтар санын азайтудың тұрақты үрдісі сақталғанын көрсетеді. Атап айтқанда 2018 жылы 292,2 мыңнан 2022 жылы 157,4 мыңға дейін. Осы кезеңде қылмыстық құқық бұзушылықтардан зардап шеккен адамдардың саны 1,7 есеге қысқарды. Қылмыстан зардап шеккен әйелдер саны 116,7 мыңнан 64,1 мыңға дейін, ерлер саны 126,1 мыңнан 72,8 мыңға дейін қысқарды. Жалпы, талданып отырған кезеңде кісі өлтіру саны 823-тен 520-ға дейін, денсаулыққа қасақана ауыр зиян келтіру 2 198-ден 1 840-қа дейін, зорлау 3 есе қысқарды», - делінген тұжырымдамада.
Министрлік ақпаратына сай, қылмыстық құқық бұзушылықтардың жалпы саны төмендегенімен, олардан болған залал көлемі ұлғайды. Яғни, келген шығын 237,3 млрд теңге болса, былтыр ол 495,1 млрд теңгеге дейін өскен.
«Жалпы, қылмыстардан болатын қаржылық залалдың негізгі үлесі жеке және заңды тұлғаларға тиесілі – 51,8%, ал мемлекетке қатысты – 48,2%. Бұл ретте зиянның жартысынан астамы жыл сайын меншікке қарсы қылмыстармен (ұрлық, алаяқтық, сеніп тапсырылған бөтен мүлікті иемдену және ысырап ету) және 26,5 % экономикалық қызмет саласындағы қылмыстармен байланысты», - деп жазылған құжатта.