Көкшетауда жалғызбасты ананың өліміне кінәлілер жазадан құтылып кетті
Жүргізуші куәлігі болмаған әйел күйеуінің көлігін тізгіндеп, жалғызбасты ананы басып өлтірген еді.
SMARTNEWS.KZ басылымының хабарлауынша, Көкшетауда адам өліміне себеп болған жол апатынан кейін көлік иесіне қатысты қозғалған қылмыстық іс тоқтатылды. Ер адам көлігін жүргізу құқығы жоқ әйеліне бергені үшін жауапқа тартылған, алайда іс амнистия қолданылуына байланысты аяқталған. Бұл туралы Kazinform басылымы жазды.
Оқиға 2026 жылдың 9 мамырында Көкшетаудағы «Сарыарқа» шағынауданының бір ауласында болған.
Алдын ала мәлімет бойынша, аулаға кіріп келе жатқан көлік жол жиегімен жүріп келе жатқан жаяу жүргіншіні қағып, кейін оның үстінен өтіп кеткен.
Рөлде көлік иесінің әйелі отырған. Алайда оның жүргізуші куәлігі болмаған.
Осы оқиға бойынша әйелге қатысты қылмыстық іс қозғалып, Көкшетау қалалық сотында қаралған.
Сот оны жол қозғалысы ережесін бұзып, абайсызда адам өліміне әкелгені үшін кінәлі деп танып, 2 жыл 6 айға бас бостандығынан айыру жазасын тағайындаған.
Алайда сот әйелдің екі кішкентай баласы бар екенін ескеріп, жазаны өтеуді үш жылға кейінге қалдырған.
Көлік иесіне қатысты іс бөлек қаралған
Ал көлік иесіне қатысты іс жеке өндіріске шығарылған.
Тергеу барысында ер адамның жүргізуші куәлігі жоқ адамға көлігін басқаруға бергені анықталған. Бұл әрекет Қазақстан Қылмыстық кодексінің 349-бабы 3-бөлігі бойынша қаралған.
Ақмола облысы полиция департаментінің мәліметінше, сотқа дейінгі тергеу аяқталған соң іс бойынша процессуалдық шешім қабылданған.
«Қылмыстық іс Қазақстан Республикасы Қылмыстық-процестік кодексінің 35-бабы 1-бөлігінің 3-тармағына сәйкес, амнистия актісін қолдануға байланысты тоқтатылды», – деп хабарлады ведомство.
Осылайша, өліммен аяқталған жол апатына байланысты жүргізілген тергеуде жүргізуші әйел жаза алғанымен, көлік иесі амнистияға байланысты қылмыстық жауапкершіліктен босатылды.
Материал авторы
