RUS
Тараптар қазақстандық өнімді Қытай нарығында ілгерілету жөніндегі іс-шараларды бірлесіп ұйымдастыруға келісті.
«Стратегиялық құжат Қазақстан мен Қытай компаниялары арасындағы бірлескен жұмыстың тиімділігін арттыруға, тығыз коммерциялық қатынастарды дамытуға және Қытайға дайын қазақстандық өнімнің шикізаттық емес экспортының көлемін ұлғайтуға бағытталған», - деді ҚХР-дағы KazakhExport өңірлік директоры Сергей Салманов.
Меморандумға сәйкес «Ухань Ханьоу» қазақстандық өнімді импорттайды және оны Хубэй провинциясы мен Қытайдың сауда желілерінде тақырыптық бөлімдер арқылы, қазақтың ұлттық стилінде мамандандырылған стендтер орната отырып сатады. Компания қазақстандық тауарлар мен KazakhExport мүмкіндіктерін ел аумағында ілгерілетуге қолдау көрсетеді.
Қазақстанның ұлттық экспорттық сақтандыру компаниясы отандық өндірушілермен байланыс орнатуға және импорттаушыларды қызықтыратын өнімді іздеуге жәрдемдеседі. Сондай-ақ, қазақстандық экспорттаушылар үшін қажетті сақтандыру мен қаржыландыруды қамтамасыз етеді.
Тараптар қазақстандық тауарлардың жергілікті тұтынушылар арасында жоғары сұранысқа ие болатынына сенім білдірді. ҚХР-ға май-тоңмай, макарон, кондитерлік өнімдерді, сусындар мен басқа да тауарларды жеткізу жөнінде уағдаластыққа қол жеткізілді.
Жыл басынан бері 53 млрд теңгеге экспорттық келісімшарттар бекітілген. Қытайдың 11 импорттаушысымен ұн және күнбағыс дәнін жеткізу бойынша 17 келісімшарт жасалған.
Айта кетсек, 2019 жылы KazakhExport және Wuhan Asia Europe Logistics Co ынтымақтастығы аясында Ухань қаласында қазақтың ұлттық стилінде безендірілген алғашқы тақырыптық бөлім ашылған еді. Алайда, пандемияға байланысты ынтымақтастық тоқтаған болатын.
«Ухань Ханьоу» - Han Xin Ou халықаралық маршруттық пойыздарына арналған ҚХР мемлекеттік теміржол жүк платформасы. Хубэй провинциясының ондаған қаласында заманауи әмбебап дүкендері, сауда орталықтары, супермаркеттері бар. Сондай-ақ, импорт бағытында көлік логистикасы мен кең дистрибьютерлік желісі жолға қойылған. Компанияны Ухань үкіметі субсидиялайды және ол – «Бір белдеу – бір жол» саясатының мүшесі.