Алматыда cайлау учаскелерінің маңында жәрмеңкелер жұмыс істейді
Сайлау учаскесіне барған тұрғындар мектепке қажетті заттарды да сатып ала алады.
SMARTNEWS.KZ басылымының хабарлауынша, Алматыда Құрылтай сайлауы өтетін күні сайлау учаскелерінің маңында мектеп және азық-түлік жәрмеңкелері ұйымдастырылады. Бұл тұрғындарға дауыс беріп қана қоймай, жаңа оқу жылына қажетті заттар мен азық-түлікті бір жерден сатып алуға мүмкіндік береді.
Жетісу ауданында жәрмеңкелер №148 және №101 гимназиялардың, Мәдениет үйі мен №177 орта мектептің жанында жұмыс істейді. Ал Алатау ауданында сауда алаңдары №30, №35 және №20 сайлау учаскелерінің маңында орналасады.
Наурызбай ауданында мектеп жәрмеңкелерінен кеңсе тауарлары мен оқушыларға қажетті оқу құралдарын сатып алуға болады. Сауда орындары №174 мектеп-гимназияның, сондай-ақ №538, №577, №649, №684, №214, №625, №679, №680, №681 және №682 сайлау учаскелерінің жанында ұйымдастырылады.
Ұйымдастырушылардың мәліметінше, мектеп жәрмеңкелері сағат 19:00-ге дейін жұмыс істейді. Ал аспаздық өнімдер сатылатын орындар дауыс беру аяқталғанға дейін қызмет көрсетеді.
Алмалы ауданында да тұрғындарға арналған сауда алаңдары бірнеше жерде ашылады. Жәрмеңкелер Арбатта, №147 орта мектептің, Қазақ спорт және туризм академиясының және «Целинный» заманауи мәдениет орталығының маңында өтеді.
Сонымен қатар ауданда азық-түлік жәрмеңкелері ұйымдастырылып, онда нан-тоқаш өнімдері, жаңа піскен өнімдер, алма және басқа да жемістер ұсынылады.
Әуезов ауданында да сайлау учаскелерінің маңында онға жуық жәрмеңке жұмыс істейді. Сауда орындары №5, №1, №111, №122, №123, №117, №153 және №202 мектеп-гимназиялары мен мектептердің жанында, сондай-ақ Халықаралық көлік-гуманитарлық университеті мен Алматы технологиялық колледжі аумағында ұйымдастырылады.
Түрксіб ауданында да тұрғындар сайлау учаскесіне жақын жерден қажетті тауарларды сатып ала алады. Мәселен, Сейфуллин даңғылы, 13/1 мекенжайындағы №456 учаскенің жанында мектепке қажетті керек-жарақтар, жергілікті өндіріс және нан-тоқаш өнімдері сатылады.
Сүйінбай даңғылы, 207 мекенжайындағы №460 сайлау учаскесінің маңында жергілікті өндірушілердің тауарлары ұсынылады. Ал Гете көшесі, 261-дегі №421 учаскенің жанында көкөніс пен жеміс-жидек сатылатын ауыл шаруашылығы жәрмеңкесі өтеді.
Бұдан бөлек, Досбол би көшесі, 31-дегі №523 және Кассин көшесі, 51-дегі №457 сайлау учаскелерінің жанында жергілікті өндіріс тауарлары мен нан-тоқаш өнімдерінің жәрмеңкесі ұйымдастырылады.
Осылайша, Алматы тұрғындары дауыс беруге барған күні сайлау учаскелеріне жақын орналасқан сауда орындарынан азық-түлік пен жаңа оқу жылына қажетті тауарларды сатып ала алады.