Риддерде ер адам туған қызын 6 жасынан бері зорлап келді деген күдікке ілінді
Қазір тергеушілер бірнеше жылға созылды деген күдікті жағдайдың барлық мән-жайын анықтап жатыр.
SMARTNEWS.KZ басылымының хабарлауынша, Шығыс Қазақстан облысының Риддер қаласында ер адам кәмелетке толмаған туған қызына бірнеше жыл бойы жыныстық сипаттағы зорлық-зомбылық жасады деген күдікке ілінді. Күдікті ұсталып, қамауға алынған.
Әлеуметтік желілерде тараған мәліметтерге сәйкес, қыз бала әкесінің тарапынан 6 жасынан бастап зорлық-зомбылыққа ұшыраған болуы мүмкін. Қазір оның жасы 13-14 шамасында екені айтылған.
Ақпарат тарағаннан кейін Шығыс Қазақстан облысы полиция департаменті бұл дерек бойынша Риддер қаласының полиция бөлімінде қылмыстық іс қозғалғанын растады.
Полиция мәліметінше, күдікті жұмыс орнында ұсталған. Қазір ол қамауда отыр.
Тергеу барысында оқиғаның барлық мән-жайы, соның ішінде күдікке ілінген қылмыстың нақты жағдайлары анықталып жатыр. Іс Шығыс Қазақстан облысы полиция департаменті басшылығының бақылауында.
Полиция Қылмыстық-процестік кодекстің 201-бабына сәйкес, тергеу мүддесіне байланысты әзірге қосымша ақпарат жарияланбайтынын хабарлады.
Күдіктінің кінәсі соттың заңды күшіне енген үкімімен дәлелденбейінше, ол кінәсіз деп есептеледі.
Материал авторы
