Құрылтайда қай партия қанша орын алды? ОСК нақты нәтижені жариялады

SMARTNEWS.KZ басылымының хабарлауынша, Қазақстанда 23 тамызда өткен Құрылтай депутаттарын сайлау қорытындыланып, саяси партиялардың алған мандат саны жарияланды. Орталық сайлау комиссиясының мәліметінше, сайлау нәтижесінде бес партия Құрылтай құрамынан орын алған. Бұл туралы Орталық сайлау комиссиясы хабарлады.

Мандаттар партиялар арасында мынадай тәртіппен бөлінді:

• «Әділет» партиясы – 110 мандат;

• «Ауыл» халықтық-демократиялық патриоттық партиясы – 10 мандат;

• Respublica партиясы – 9 мандат;

• Қазақстанның «Ақ жол» демократиялық партиясы – 8 мандат;

• Жалпыұлттық социал-демократиялық партия – 8 мандат.

Осылайша, мандат саны бойынша «Әділет» партиясы айқын басымдықпен алға шықты. Қалған төрт саяси күш Құрылтайдағы орындардың салыстырмалы түрде шағын бөлігін иеленді.

Ал Қазақстанның халық партиясы мен «Байтақ» партиясы сайлау нәтижесі бойынша Құрылтай құрамына өте алмады.

Сайлау науқаны кезінде партиялар Құрылтай депутаттығына әртүрлі көлемде кандидат ұсынған. «Әділет» партиясының тізімінде 186 кандидат болса, ОСДП 33 кандидат ұсынды. «Ауыл» партиясы 69, «Ақ жол» 63, ал Respublica 76 кандидатпен сайлауға қатысты.

Орталық сайлау комиссиясының мәліметінше, Қазақстанда дауыс беру құқығына ие азаматтардың жалпы саны 12 623 289 адамды құрады. Сайлауға 9 351 539 адам қатысып, бұл жалпы электораттың 74,08 пайызына тең болды.

Айта кетейік, бұл көрсеткіш референдуммен салыстырғанда жоғары. Сайлауда дауыс бергендер саны бұған дейінгі референдумдағы көрсеткіштен 224 357 адамға көп болды.

Сөйтіп, Құрылтай сайлауының нәтижесі бойынша партиялардың мандаттық үлесі анықталып, жаңа құрамдағы саяси күштердің ара салмағы айқындалды.