БҚО-да жанжал кезінде әйел бірге тұратын ер адамды өлтірген

SMARTNEWS.KZ басылымының хабарлауынша, Батыс Қазақстан облысының Теректі ауданында тұрмыстық жанжал қайғылы жағдайға ұласқан. Сот материалдарына сәйкес, әйел бірге тұратын ер адамды пышақ жарақатынан кейін өлтірген. Алқабилердің қатысуымен өткен сот отырысында айыпталушы 10 жылға бас бостандығынан айырылды. 

Сотта анықталғандай, оқиға 2026 жылғы 3 қаңтарда кешкі сағат 18:00 шамасында болған. Әйел үйде кешкі ас әзірлеп жатқан кезде бірге тұратын ер адам үйге келген. Сот мәліметінде оның алкогольдік ішімдік ішкені айтылған.

Кейін екеуінің арасында жанжал шыққан. Сот нұсқасына сәйкес, ер адам әйелдің мойнынан ұстап, қылқындыра бастаған. Артынша оны босатып, басқа бөлмеге барып диванға жатқан. Алайда жанжалды тоқтатпай, әйелді балағаттаған.

Осыдан кейін әйел ас үйдегі үстелден пышақ алып, бөлмеге кіріп, диванда жатқан ер адамның кеуде тұсына соққы жасаған. Жарақат салдарынан оның жүрегі зақымдалып, ер адам оқиға орнында көз жұмған.

Істің қаралуы барысында әйел өз кінәсін мойындамаған. Ол адам өлтірмегенін айтып, тағылған айыппен келіспеген.

Алайда сот пен алқабилер істегі дәлелдер мен бейнежазбаларды зерделей келе, әйелдің кінәсі толық дәлелденді деген қорытындыға келген.

Мемлекеттік айыптаушы соттан әйелді 11 жылға бас бостандығынан айыруды сұраған. Жәбірленуші тарап та қатаң жаза тағайындауды талап еткен.

Сот әйелдің әрекетін қасақана адам өлтіру ретінде бағалап, оған 10 жыл бас бостандығынан айыру жазасын тағайындады. Сот шешімінде жазаны жеңілдететін де, ауырлататын да мән-жайлар анықталмағаны айтылды.

Үкім заңды күшіне енді.