SpaceX $100 млрд-қа жаңа ғарыш айлағын салады

SMARTNEWS.KZ басылымының хабарлауынша, SpaceX компаниясы аса ауыр Starship зымырандарын ұшыру санын арттыру үшін АҚШ-тың Луизиана штатында жаңа ғарыш айлағын салуды жоспарлап отыр. Жобаның құны шамамен 100 миллиард доллар болады.

Компанияға жаңа нысан үшін штаттың жағалауынан аумағы 506 шаршы шақырым болатын жер телімі бөлінген. Қазір Starship зымырандары негізінен Техастың оңтүстігіндегі ұшыру алаңынан жіберіледі. Сонымен қатар SpaceX Флоридадағы Канаверал мүйісіндегі екінші нысанды да пайдалана алады. Луизианадағы кешен іске қосылғаннан кейін Starship үшін тұрақты ұшыру алаңдарының тағы біріне айналмақ.

SpaceX президенті Гвинн Шотвелл Луизианадағы іс-шара барысында жаңа жобаны «ғылыми фантастикадан ғылыми шындыққа айналатын» ауқымды бастама ретінде сипаттады.

Компанияның жоспары бойынша Starship сериялық өндіріс кезеңіне шыққаннан кейін тәулігіне бірнеше рет ұшырылуы мүмкін. SpaceX бұл зымырандарды орбитаға спутниктік есептеу орталықтарын және жаңа буын Starlink байланыс спутниктерін шығару үшін пайдаланбақ.

Жаңа ғарыш айлағы дәстүрлі түрде Starbase деп аталады. Кешен құрамында бес ұшыру кешені болады, олардың әрқайсысында екі ұшыру алаңы қарастырылған. Мұнда зымырандарға арналған отын өндіріліп, электр энергиясы өндірілмек. Сонымен бірге қайта пайдаланылатын Starship зымырандары келесі ұшуға дейін техникалық қызметтен өтеді.

Жоба аясында ғарыш айлағы қызметкерлері мен олардың отбасыларына арналған тұрғын аудан салу да көзделген. Құрылыс жұмыстары 2027 жылы басталып, нысанды 2029 жылға қарай пайдалануға беру жоспарланып отыр. Жоба нәтижесінде 3 мыңнан 10 мыңға дейін жаңа жұмыс орны ашылуы мүмкін.

Луизианадағы кешеннің тағы бір ерекшелігі — табиғи газ көздеріне жақын орналасуы. SpaceX оны Starship үшін отын өндіру мақсатында пайдалануды жоспарлап отыр.

Компания Техастағы Terafab атты ірі өндірістік нысанның құрылысына да қатысып жатыр. Оның көмегімен Starship үшін жаппай өндіріс жолға қойылмақ. SpaceX болашақта бұл зымырандарды пайдаланып, орбитаға Nvidia есептеу компоненттерімен жабдықталған 1 миллионға дейін арнайы деректер орталығын шығаруды көздейді.

Сонымен қатар Starship жаңа буындағы Starlink спутниктерін орбитаға жеткізудің негізгі құралына айналмақ. Бұған дейін мұндай миссияларда Falcon 9 қолданылып келді. Алайда жүк көтеру мүмкіндігі жағынан Starship одан әлдеқайда қуатты.

SpaceX Луизианада тек ғарыш айлағын салумен шектелмей, жағалаудағы аумақтарды қалпына келтіруге, жергілікті экожүйені сақтауға және дауылдардан қорғанысты күшейтуге қатысуды жоспарлап отыр. Жағалаудағы батпақты алқаптар көптеген көшпелі құстардың мекені болғандықтан, компания тұрақты зымыран ұшыру жұмыстары табиғи ортаға кері әсер етпейді деп есептейді.