Тамызда еліміздегі әлеуметтік маңызы бар азық-түлік бағасы арзандаған

SMARTNEWS.KZ басылымының хабарлауынша, Қазақстанда тамыз айының қорытындысы бойынша әлеуметтік маңызы бар азық-түлік тауарларының бағасы 0,2%-ға төмендеді. Ал жыл басынан бергі баға өсімі небәрі 1,4%-ды құрады. Бұл өткен жылдың сәйкес кезеңіндегі 7,9%-дық көрсеткіштен бес еседен астам төмен. 

Сауда және интеграция министрлігінің мәліметінше, соңғы аптаның қорытындысында әлеуметтік маңызы бар азық-түлік тауарлары индексі 100%-ды құраған. Яғни, бір апта ішінде баға өзгеріссіз қалған.

Жалпы алғанда, тамыз айының басынан бері әлеуметтік маңызы бар азық-түлік 0,2%-ға арзандады. Жыл басынан бергі баға өсімі де айтарлықтай баяулады.

Министрлік мұндай жағдайға жаңа өнімнің маусымдық түрде нарыққа шығуы әсер еткенін мәлімдеді. Әсіресе көкөніс өнімдерінің арзандауы жалпы баға индексін ұстап тұруға мүмкіндік беріп отыр. Кейбір тауарлар қымбаттағанымен, олардың әсерін арзандаған өнімдер өтеп жатыр.

Азық-түлік бағасының баяулауы жалпы инфляция көрсеткішіне де ықпал етті. Жылдық азық-түлік инфляциясы өткен жылдың желтоқсанындағы 13,5%-дан биылғы шілде қорытындысы бойынша 10,1%-ға дейін төмендеген.

Билік бағаны тұрақтандыруды тек маусымдық өнімге артып отырған жоқ. Негізгі назар азық-түліктің соңғы бағасына тікелей әсер ететін делдалдарға, базарлардағы жағдайға, тасымал шығындарына және өндірушілердің босату бағасына аударылып отыр.