5 жыл бойы жалақысын өзі көтеріп отырған балабақша бухгалтері 30 млн теңге жымқырды деген күдікке ілінді
Батыс Қазақстан облысында бюджет қаржысын аса ірі көлемде жымқыру дерегі бойынша сотқа дейінгі тергеу басталды.
SMARTNEWS.KZ басылымының хабарлауынша, Батыс Қазақстан облысында балабақша бухгалтеріне қатысты қылмыстық іс қозғалды. Ол бес жыл бойы өзіне заңсыз түрде қосымша жалақы аударып, бюджетке 30 млн теңгеден астам шығын келтірді деген күдікке ілініп отыр. Бұл туралы Батыс Қазақстан облысы прокуратурасы жазды.
Прокуратураның хабарлауынша, оқиға Сырым ауданындағы балабақшалардың бірінде болған. Тексеру барысында бухгалтердің штат кестесінде көрсетілген жалақы көлемінен артық қаражатты өз банк шоттарына аударып отырғаны анықталған.
«Прокуратура тексеруі нәтижесінде балабақша бухгалтері бес жыл ішінде штаттық кестеде бекітілген жалақыдан тыс 30 млн теңгеден астам қаражатты негізсіз түрде өз есепшоттарына аударғаны анықталды», – деп хабарлады ведомство.
Аталған дерек бойынша аудан прокуратурасы Қазақстан Республикасы Қылмыстық кодексінің 189-бабы 4-бөлігі 2-тармағы бойынша сотқа дейінгі тергеу бастаған.
Бұл бап аса ірі мөлшерде ұрлық жасау әрекетін қарастырады. Іс материалдары әрі қарай тергеу жүргізу үшін Батыс Қазақстан облысы бойынша Экономикалық тергеу департаментіне жолданды.
Қазір сотқа дейінгі тергеу жалғасып жатыр.
Егер күдіктінің кінәсі сотта дәлелденсе, оған мүлкін тәркілеумен қатар 12 жылға дейін бас бостандығынан айыру және белгілі бір қызметтерді атқару құқығынан айыру жазасы тағайындалуы мүмкін.
Материал авторы
