«Жұмыс» ұсынып, есірткі бизнесіне салған: Қазақстанда халықаралық қылмыстық желі ұсталды
Қылмыскерлер интернеттегі тартымды вакансиялар арқылы операторлар, HR-мамандар, химиктер мен курьерлерді іздеп, оларды халықаралық есірткі бизнесіне тартқан.
Қазақстанда азаматтарды жалған жұмыс ұсыныстары арқылы халықаралық есірткі бизнесіне тартқан қылмыстық желінің әрекеті тоқтатылды. Қылмыстық топ интернет арқылы call-орталық операторлары, HR-менеджерлер, химиктер, курьерлер, есірткі «жасырынатын орындарына» жеткізушілер, логистер мен қойма қызметкерлерін іздеген.
Арнайы операция бір жылдан астам уақытқа созылып, бірнеше мемлекетті қамтыған. Оған Қазақстан мен Украина құқық қорғау органдары, Албания полициясы, Интерпол және АҚШ-тың Есірткіге қарсы күрес басқармасы қатысқан.
МВД мәліметінше, қылмыстық желіні 36 жастағы шетел азаматы ұйымдастырған. Қазақстанның Ішкі істер министрлігі операцияның негізгі кезеңдеріне, соның ішінде цифрлық дәлелдерді талдауға, желі мүшелерін анықтауға, тінту жүргізіп, күдіктілерді ұстауға қатысқан.
Мыңдаған цифрлық дәлел қылмыстық желінің ізін ашқан
Украинадағы қылмыстық әрекетті құжаттау барысында құқық қорғау органдары жалған жұмысқа қабылдау орталықтарында 26 тінту жүргізген.
Нәтижесінде шамамен 4 мың цифрлық дәлел тәркіленген. Оларды талдау арқылы Telegram желісінде жұмыс істеген 31 есірткі дүкені анықталып, қылмыстық схеманы ұйымдастырушылар мен оған тартылған жүздеген адам әшкереленген.
Олардың Қазақстан аумағында есірткі таратумен байланысы бар-жоғы да тексерілген.
Киевте 70, Қазақстанда тағы 15 тінту жүргізілді
Мамыр айында Қазақстан ІІМ өкілдерінің қатысуымен Киев пен Киев облысында 70 тінту жүргізілген. Операция барысында жалған жұмысқа қабылдау орталықтарының қызметі тоқтатылып, қылмыстық қауымдастықтың 27 белсенді мүшесі анықталған.
Шілде айында құқық қорғау органдары жұмысты Қазақстан аумағында жалғастырды. Украина полициясының қатысуымен тағы 15 тінту жүргізіліп, ел аумағында есірткі сатуға күдікті желі мүшелері ұсталды.
Қылмыстық жұмыстан шыққысы келгендерді ұрып-соққан
ІІМ мәліметінше, қылмыстық топтың ішінде қатаң тәртіп орнаған. Есірткі бизнесінен кеткісі келген адамдарға айыппұл салынған, оларды ұрып-соғып, кей жағдайда заңсыз ұстап отырған.
«Тартымды вакансиялардың артында жұмысқа орналасу емес, адамды есірткі бизнесіне тарту тұрған. Оған кірген адамға кейін бұл қызметтен шығуға мүмкіндік бермеген», – деді ІІМ есірткі қылмысына қарсы іс-қимыл комитеті төрағасының орынбасары Қуандық Әлжанов.
Оның айтуынша, қылмыстық құрылымда әр адамның міндеті нақты бөлінген.
Арнайы операция кезінде есірткі мен мыңдаған орама тәркіленді
Операцияның соңғы кезеңінде Украинадағы бес облыс пен Киевте тағы 35 тінту жүргізілген.
Нәтижесінде азаматтарды қылмыстық қызметке тартумен айналысқан халықаралық желінің екі буыны жойылды.
Құқық қорғау органдары синтетикалық есірткі араласқан 24 келі қоспа, 3,5 мыңнан астам дайын орама және шамамен 2 мың оралған пакет тәркіледі.
Жеті адам ұсталды. Тағы тоғыз қатысушыға қылмыстық іс бойынша айып тағылған.
ІІМ тергеудің әлі аяқталмағанын мәлімдеді. Қазір құқық қорғау органдары халықаралық желінің ұйымдастырушылары мен басқа да қатысушыларын анықтап жатыр.
Материал авторы
