«Басын қабырғаға ұрды»: Алматыда ерлі-зайыпты полиция қызметкерлерінің қатыгездік көрсеткенін мәлімдеді

SMARTNEWS.KZ басылымының хабарлауынша, Алматыда бір ер адам мен әйел полиция қызметкерлері оларды ұстау кезінде күш пен психологиялық қысым көрсеткенін мәлімдеді. Жұптың айтуынша, оқиға 19 қыркүйекте таңғы уақытта болған.

Әлеуметтік желіде жарияланған жазбада ер адамды ұстау барысында оған күш қолданылғаны айтылған. Оның мәлімдеуінше, полиция қызметкерлері қол-аяғын бұрап, қолын кілтпен жаралаған, басын қабырғаға ұрған, шашынан сүйреп, аяғын басқан. Жазба авторы өз сөзінің дәлелі ретінде қолындағы жарақаттың суретін де жариялаған.

Әйел де ұстау кезінде өзіне физикалық және психологиялық қысым көрсетілгенін айтқан. Сонымен қатар ол өз келісімінсіз қорлайтын сипаттағы сексуалдық әрекеттер жасалғанын мәлімдеген.

Жұптың айтуынша, оларды алдымен полиция бөліміне жеткізген, кейін бір бөлімшеден екіншісіне қызметтік емес, азаматтық көлікпен апарған.

Жазба авторы ұстау мен полицияға жеткізу уақытына да күмән келтірген. Оның сөзінше, іс жүзінде полиция бақылауына бұдан ертерек алынғанымен, құжаттарда жеткізілген уақыт 08:00 деп көрсетілген. Сондай-ақ ол ұстау кезінде олардың ұялы телефондары полиция қызметкерлерінің қолында болғанын және сол телефондардан қоңыраулар жасалғанын айтқан.

Осы мәлімдемелерден кейін Алматы қаласы Полиция департаментінің баспасөз қызметі мәлімдеме жасады.

Ведомство әлеуметтік желілерде тараған полиция қызметкерлері азаматтарды ұрып-соққаны және өзге де заңсыз әрекеттерге барғаны туралы ақпаратты жоққа шығарды.

Полицияның мәліметінше, 19 қыркүйекте шамамен сағат 06:30-да Байтурсынов көшесіндегі үйлердің бірінің тұрғындары ауладағы қоғамдық тәртіптің бұзылғанына шағымданған. Оқиға орнына келген тәртіп сақшылары алкогольдік ішімдік ішкені байқалған ер адам мен әйелді көрген. Олар қатты дауласып, тұрғындардың тыныштығын бұзған.

Полиция қызметкерлерінің айтуынша, жұп тәртіп бұзуды тоқтату туралы заңды талаптарға бағынбай, қарсылық көрсеткен. Екеуі полиция бөлімшесіне жеткізілгеннен кейін де агрессивті мінез-құлық танытып, бір-бірімен жанжалдасқан, процессуалдық әрекеттерді жүргізуге кедергі келтіріп, тәртіп сақшыларына күш көрсетіп қарсылық білдірген.

Полиция оқиғаның барысы мен ұсталған азаматтардың әрекеті бейнебақылау камераларына жазылғанын атап өтті. Ведомство қолда бар бейнежазбалар полиция қызметкерлері заңсыз әрекет жасады деген мәлімдемелерді жоққа шығаратынын айтты.

Оқиғаға байланысты екі азаматқа да қоғамдық тәртіпті бұзғаны және полиция қызметкерлерінің заңды талаптарына бағынбағаны үшін әкімшілік іс қозғалып, материалдар сотқа жолданған.

Сонымен қатар полиция азаматтардың өзін ұрып-соққаны туралы жалған ақпарат таратқаны жөніндегі мәлімдемелерге де құқықтық баға берілетінін хабарлады. Ведомство көрінеу жалған ақпарат таратқан тұлғаларға заңға сәйкес қатаң шара қолданылатынын мәлімдеді.