Маңғыстауда 2 жасар қыз қарақұртты жұтып қойған болуы мүмкін
Бүлдіршіннің жағдайы күрт нашарлап, өкпені жасанды желдету аппаратына қосылған.
SMARTNEWS.KZ басылымының хабарлауынша, Маңғыстау облысында екі жасар қыздың жағдайы күрт нашарлап, ол комаға түсті. Бүлдіршін өкпені жасанды желдету аппаратына қосылып, он күн бойы жансақтау бөлімінде ем қабылдаған. Дәрігерлер оған қарақұрт уына қарсы сарысуды екі рет енгізген. Кейін жағдайы жақсарған қыз үйіне шығарылды. Бұл туралы Lada.kz сайты жазды.
Басылымның мәліметінше, оқиға балалардың ойыны кезінде болған. Басқа бір кішкентай бала екі жасар қызға өрмекші берген. Бүлдіршін оны жұтып қоюы мүмкін. Оқиға орнында болған алты жасар бала өрмекшінің қарақұрт екенін айтқан. Алайда қыздың өрмекшіні шынымен жұтып қойғаны нақты расталмаған.
Біраз уақыттан кейін баланың жағдайы күрт нашарлап, шұғыл медициналық көмек қажет болған. Алдымен оны аудандық ауруханаға жеткізген. Кейін облыстық балалар ауруханасының мамандары аудандық әріптестерімен телемедициналық кеңес өткізіп, емдеу тактикасын талқылаған.
Бүлдіршіннің жағдайы ауыр болғандықтан, оған қарақұртқа қарсы сарысу енгізіліп, облыс орталығына шұғыл жеткізу ұйымдастырылған. Қызды медициналық авиацияның реанимациялық бригадасы өкпені жасанды желдету аппаратымен тасымалдаған.
Ауруханаға түскен кезде бала бірінші дәрежелі комада болған. Дәрігерлер қарқынды емді бастап, консилиум өткізген әрі республикалық деңгейдегі мамандармен қосымша кеңескен. Емдеу барысында қарақұртқа қарсы сарысу екі рет енгізілген.
Қыз он күн бойы жансақтау бөлімінде дәрігерлер мен медбикелердің тәулік бойғы бақылауында болған. Біртіндеп жағдайы жақсарып, комадан шыққан. Кейін өздігінен тыныс ала бастаған соң, оны өкпені жасанды желдету аппаратынан ажыратқан.
Одан соң бүлдіршін бейінді бөлімге ауыстырылып, тағы төрт күн ем қабылдаған. Жағдайы тұрақтанғаннан кейін дәрігерлер оны қанағаттанарлық күйде үйіне шығарған.
Материал авторы
