Атырауда полиция әрекетіне наразылық білдіріп, тікенекті сыммен қоршалған темір дуалға шыққан ер адамның ұсталу сәті түсірілген видео әлеуметтік желіде тарады. Оқиға 13 қазанда болған. Өңірлік полиция департаменті жағдайға қатысты түсініктеме берді. Бұл туралы «Ақ Жайық» басылымы жазды.
Басылымның мәліметінше, оқиға Атырау тұрғынының бір әйелмен жанжалдасуынан басталған. Осыдан кейін ер адам екі танысымен бірге мәселені шешуге барған. Олар өздерімен бірге пневматикалық қару алып шыққан.
Кездесу барысында тараптар ортақ келісімге келе алмаған. Сол кезде ер адамдардың бірі қарсыласына пневматикалық тапаншадан үш рет оқ атқан. Алайда жанжал мұнымен аяқталмай, төбелеске ұласқан. Төбелес кезінде суық қару да қолданылған.
Кейін осы іске қатысқан екі ер адам нақты мерзімге бас бостандығынан айырылды. Ал әлеуметтік желідегі видеодағы азамат бұл іс бойынша куәгер ретінде өткен.
«Ақ Жайық» басылымының дереккөзінің айтуынша, сотталған екі азамат шартты жаза аламыз деп үміттенген. Алайда сот үкімі оларды есеңгіретіп, бұған дейін айтпай келген жайттарды ашуға итермелеген.
Олардың сөзінше, жанжалды бастаған адам дәл осы куәгер болған. Бастапқыда олар оның рөлін жасырған, себебі ер адамның ұрлық үшін бұрын сотталғаны болған және жаңа қылмыстық іс оның бас бостандығынан айырылуына әкелуі мүмкін еді. Бірақ өздері сотталғаннан кейін бұл жайтты жасыруды жөн көрмеген.
Сотталғандардың сөзін тыңдаған сот олардың серігінің әрекетіне құқықтық баға беру қажеттігі туралы жеке қаулы шығарған. Осыдан кейін куәгерге қатысты бұзақылық бабы бойынша бөлек қылмыстық іс қозғалып, қыркүйекте ол күдікті мәртебесін алған.
Алайда оны тергеуге шақыру оңай болмаған. Полицияның мәліметінше, ер адам тергеушінің шақыруларын елемеген. Ал өзі блогерлер мен журналистерге жүгініп, құқық қорғау органдарының қысым көрсетіп, полицияға күштеп жеткізуге тырысып жатқанын айтқан.
6 қазанда ер адам Атыраудағы Самал шағынауданында көпқабатты үйдің екінші қабатындағы кондиционердің сыртқы блогына шығып, полиция әрекетіне наразылық білдірген. Келіссөздерден кейін оны төмен түсіріп, қолхатпен босатқан.
Алайда 13 қазанда ол бұл әрекетін тағы қайталап, бұл жолы тікенекті сыммен қоршалған темір дуалға шыққан. Ер адамды ұстау сәті видеоға түсіп, әлеуметтік желіде тарады. Әсіресе ұлын босатуды өтініп, полиция қызметкерлеріне жалынған анасының «Жоқ, жібер баланы!» деген айқайы жұрттың назарын аударды.
Бұл жолы ер адам қолхатпен босатылған жоқ. Ол Қазақстан Республикасы Қылмыстық-процестік кодексінің 128-бабы тәртібімен ұсталып, уақытша ұстау изоляторына қамалды.
Атырау облысының полиция департаменті екі оқиғада да бір адам туралы сөз болып отырғанын растады. Ведомство заңсыз қудалау туралы айыптауларды жоққа шығарып, ер адамның тергеуден жалтаруына байланысты осындай шара қолданылғанын түсіндірді.
