RUS
Оқиға биыл қыста болды. Бұған дейін хабарлағанымыздай, 1976 жылы туған ақтөбелік 23 ақпан күні жұмысқа шығып, үйіне қайта оралмаған. Полиция іздеу жұмыстарынан соң 29 жастағы күдіктіні ұстады. Ол әйелді пышақтап өлтіріп, денесін екі күн бойы көлігінің жүксалғышында ұстаған. Оқиғадан соң Қылмыстық кодекстің «Кісі өлтіру» бабы бойынша іс қозғалып, тергеу жүрді. Бүгін Ақтөбе облыстық қылмыстық істер жөніндегі мамандандырылған ауданаралық сотында айыптау актісі оқылды. Мемлекеттік айыптаушының айтуынша, сотталушы Д. биыл 15 ақпан күні жәбірленушімен сайт арқылы танысқан. Отбасынан ажырасқанын айтқан. Ал 21 ақпаны күні сотталушы жеңіл көлікті жалға алады. Кейін жәбірленушіні күтіп алып, үйіне жеткізіп тастайды. Сол күні телефон арқылы қайта хабарласып, жыныстық қатынасқа түседі.
«23 ақпан күні сағат 19:00-де күтіп алып, тағы кездеседі. Сол кезде сотталушының анасы қоңырау шалып, жігіттің ұялы телефоны бетінде тұрған отбасы фотосы көрінеді. Екеуі сөзге келіп, жәбірленуші соңында жасырын арақатынас туралы әйеліне айтатынын жеткізген. Сотталушы осы көзден қорқып, ашуға салынады. Көліктің алдыңғы есігіндегі тартпада тұрған пышақты алып, киініп жатқан жәбірленушінің кеуде тұсына, қол-аяғына жарақат салып, қинап, тұншықтыру үшін тамағын, желкесін бірнеше рет кескілейді. Тірі кезінде 35 кесіп-тесілген дене жарақатын келтірген», - деді айыптау актісін оқыған прокурор. Жәбірленуші дене жарақаты салдарынан оқиға орнында қаза тапқан. Кейін сотталушы жәбірленушінің денесінен құтылу, қылмыстық іс-әрекетін жасыру мақсатында көліктің жүксалғышына аяқ-қолын бүктеп салып қойған. Сотта сотталушы өз кінәсін мойындады. Алайда қатыгездікпен өлтірді дегенге келіспейді.
«Сайт арқылы таныстым. Алғашында тек сол сайт арқылы сөйлесіп жүрдік. Ұялы телефон нөмірін алып, сөйлестік. Үшінші күні төсек қатынасына түсе алмай қалып, ол маған «аурусың» деді. Сол уақытта анам хабарласып қалды. Фотоны көріп, отбасыма айтамын деді. Бір рет әйелімнен ажырасқанмын. Үш балам бар. Екі балам бірінші әйелімнен. Екінші рет отбасымды жоғалтып аламын ба деп қорқып, сондай әрекетке бардым», - деді сотталушы.
Кісі өлтірген соң оны көліктің жүксалғышына салып, киімін, көлігін жуған. Алайда полиция іздеп келгенде өз еркімен оқиғаны ешкімге айтпаған.
Сот отырысында жәбірленушінің өкілі апасының облыстық әкімдікте жұмыс істегенін, еш теріс қылығы болмағанын айтты. Ол 10 млн теңге моральдық шығын талап етті.
«Анам жүре алмайды, аяғы ауырады. Анам кешірмеймін дейді. Кешірімге келген, мен көрмедім. Ол апамды алдаған. Өте қатыгездік жасаған. Сот шешімін береді деп ойлаймын. Ата Заңда ең құндысы адам өмірі деген. Ешкім адамды өлтірмеуі керек», - деді жәбірленушінің өкілі.