RUS
Жетісу облысы әкімі баспасөз қызметінің хабарлауынша, салынып жатқан 14 нысанның 11-і жыл соңына дейін қолданысқа берілмек. Облысқа қарасты Достық, Лепсі елді-мекендері мен Текелі қаласында дене шынықтыру-сауықтыру кешені, сондай-ақ Бескөл, Үлкен Шыған, Пиджім ауылдарына спорт кешендері берілмек. Ал Шанханай және Басши ауылдарында күрес залдары іске қосылса, Талдықорған, Сарқан қалалары мен Сарыөзек ауылындағы стадиондарды қайта жөндеу жұмыстары аяқталмақ.
Осы мәселе төңірегінде бүгін Жетісу облысының әкімі Бейбіт Исабаев ОҚК ұйымдастыруымен Ескелді ауданындағы «Тау Жетісу» базасында өткен брифингісінде айта кетті.
Сонымен қатар Талдықорған қаласында волейболға арналған оқу-жаттығу спорт кешенін салу мен орталық стадионды қайта жөндеуден өткізуге қатысты жоспарлар да сараланған. Облыс әкімінің сөзінше, Ақсу ауданында 2022 жылы жеке демеушінің қолдауымен 120 орынды құрайтын спорт кешені қолдануға берілген. Ал ағымдағы жылы жеке инвесторлардың демеушілігімен жаңадан шағын отбасылық үй және үстел теннисі орталығының құрылысы басталмақ.
Дана Асылбекова