RUS
Бірнеше күн бұрын желіде Қонаев қаласында өтетін Григорий Лепстің концертіне шақыру жарнамасы шыққан болатын. Бірақ бұл хабарландыру желі қолданушыларының арасында үлкен қарсылық тудырды. Оған себеп ресейлік әртістер Николай Басков пен Григорий Лепс 15 маусым күні украиналық танкілердің көзін жойған ресей әскерилеріне 1 млн рубльден береміз деген мәлімдеме жасаған. Бұл ойды әнші Юрий Антонов та қолдаған.
Осы мәлімдемеден соң, Григорий Лепстің 8 шілдеде Қонаев қаласында өтетін, құны 50 000 теңгеден бастап, 1 млн теңгеге дейін шарықтайтын билеттер сатылымға шыққан.
Әлеуметтік желідегі белсенділердің бірі Тұрар Құсайын әкімге өз өтінішін жазды:
"Григорий Лепс Владимир Путиннің сүйікті әншісі екенін бәріміз жақсы білеміз, әрі бұл әнші Украинадағы соғысты ашық қолдайды. Өздеріңіз білетіндей, Қазақстан Республикасы Украина-Ресей қақтығысында ресми түрде бейтарап позицияны ұстанады, бірақ әрбір ұлтшыл — қазақ азаматы бірауыздан Украинаның толық жеңісін тілейді. Сізден осы Z-әртістің концертін ҚР аумағында өткізбеуіңізді сұраймын. Біз Григорий Лепс сияқты ресейлік әншілерге еркін Украинаға қарсы тұрып, тіпті Қазақстанда ақша табуына жол бермейміз", - дейді белсенді.
Бұл жағдайға қатысты саясаттанушы Досым Сәтпаев болса, соғысты қолдайтын жұлдыздарды Қазақстанға шақырғандардың бәрін жауапқа тарту керек деген пікір білдірді.
"Зигтеп" жүретін, Путиннің Украинаға қарсы соғысын қолдайтын "жұлдыздардың" бәрін, Лепстер мен басқаларды Қазақстанға шақырғандарды Қылмыстық кодекстің бір бабына сүйреп әкелуге болады.
Себебі олай келетіндердің бәрі соғысты насихаттаушылар. Олар 2022 жылдың 24 ақпанынан кейін әншілерден пропогандистерге айналып шыға келді. Дәл сол аузымен олар күні ертең Қазақстанның да егемендігі мен аумақтық тұтастығына шүбә келтіруі мүмкін", - дейді саясаттанушы.