Қасым-Жомарт Тоқаев Украин-Ресей қақтығысына қатысты Қазақстанның ұстанымын тағы айқындады

Мемлекет басшысының айтуынша, Қазақстан бұл жағдайға қатысты бейтарап ұстанымда қала береді.

- Мен бұл күрделі мәселеге қатысты ұстанымымызды айқындадым.
Біріншіден, біз БҰҰ Жарғысын қатаң сақтауымыз керек. Әрине, Біріккен Ұлттар Ұйымын әлемде теңдесі жоқ әрі әмбебап ұйым ретінде қолдауға тиіспіз.
Екіншіден, біз Қытайдың, сондай-ақ басқа да мемлекеттердің барлық бейбіт бастамасын қолдауымыз қажет.
Сондықтан жақын арада Украинадағы қарулы қақтығыс тоқтайды деп үміттенеміз. Содан кейін әлемнің осы бөлігінде берік бейбіт өмір орнайтыны туралы сөз қозғай аламыз.
Қазақстанға келетін болсақ, біз осы мақсатқа қол жеткізуге өз үлесімізді қосуға дайынбыз.
Сонымен қатар біз – Ресеймен стратегиялық серіктеспіз және бірнеше ұйымның мүшесі екенімізді атап өткен жөн. Сондықтан біздің мақсатымыз – екіжақты және халықаралық ұйымдар аясында өзара ынтымақтастығымызды нығайту үшін Ресеймен тығыз байланысты сақтау, - дейді президент мырза.

Сондай-ақ БАҚ өкілдеріне мәлімдеме кезінде Германияның Федералды Президенті Франк-Вальтер Штайнмайер де санкцияларға да қатысты пікір білдірді.

- Қазақстан мен Еуропа арасындағы сауда транзиті негізінен Ресей және Беларусь жері арқылы өтеді. Біз Қазақстанның осыған балама бағыт іздестіріп жатқанын қолдаймыз, - дейді Штайнмайер.