RUS
Мемлекет басшысы жиында маңызды бағыттың бірі – адами капитал саласындағы ынтымақтастық екенін алға тартты.
«Білім беру, біліктілікті арттыру және білім трансферті маңызды сала саналады. Бұл бағыттарды меңгермей, бәсекеге қабілетті болу мүмкін емес. Осы ретте Штайнмайер мырзаның ертең Ақтау қаласына сапары кезінде Каспий мемлекеттік университеті жанынан Қазақ-неміс инжиниринг институтының ашылуын құптаймын», - деді Қасым-Жомарт Тоқаев.
Сонымен қатар ол Шығыс Қазақстан техникалық университетінің жанындағы Қазақ-неміс ғылым және технологиялар институты осы маңызды индустриялық өңірдегі адами капитал мен бәсекеге қабілеттілікті одан әрі жетілдіруге ықпал ететінін жеткізді.
«Бұл институттар озық логистика, жасыл сутегі және жаңартылатын технологиялар үшін аса қажет пайдалы қазбалар өндіру секілді негізгі салалар бойынша мамандар даярлайды. Түлектер Қазақстан мен Германия дипломын қатар алады. Бұл – екі ел серіктестігінің тағы бір маңызды кезеңі. Болашақ түлектерді жұмысқа алатын Германия кәсіпкерлері елімізде өзін еркін сезінеді деп үміттенеміз», - деді Президент.