Ақтөбеде қой жүнінен құрылыс материалы жасалады

Ақтөбеде «KazFeltec» ЖШС болашақ тоқыма емес материалдар шығаратын зауыттың іргетасына капсула салынды.

Шараға Ақтөбе облысының әкімі Ералы Тоғжанов, «KazFeltec» ЖШС директоры Ерлан Жаңабергенов, компания қызметкерлері қатысты.

Айта кетейік, облыс әкімдігі, «KazFeltec» ЖШС және итальяндық Corm арасында консорциум құру туралы келісім былтырғы күзде жасалды.

Зауыт шығаратын негізгі өнім - экологиялық таза әрі жылу сақтау материалдары.

Шикізат ретінде қылшықты қой жүні пайдаланылады. Әзірге шаруалар жүнді өртеп, кейбірі қоқысқа лақтырып жатыр.

Алдыңғы аптада жаңа өндіріске облыс бойынша шикізат сатып алу басталды. Бұл ауыл тұрғындары үшін қосымша табыс көзіне айналады.

«Бүгінгі күні мемлекет тарапынан халықтың табысын арттыру, әлеуметтік жағдайын жақсарту мақсатында бұрын-соңды болмаған, ауқымды шаралар қабылдануда. Соның дәлелі - «Ауыл аманаты» жобасы. Аталған жобаның бір бағытының өзінде, 500-ге жуық адам 18 мың қой сатып алуға ниетті. Бүгінгі күннің өзінде облыста 1 млн. 400 мың бас қой тіркелген. Жыл сайын орта есеппен 2-2,5 мың тонна жүн өндіріледі. Бұл ретте жүнді сату мал шаруашылығындағы проблемалардың бірі. Бүгін бұл мәселе өз шешімін тапқан күн. Біз ауыл шаруашылығының барлық проблемалық мәселелерін кезең-кезеңімен шешуге тырысамыз», - деп атап өтті облыс әкімі Ералы Тоғжанов.

Өнімнің бірінші легі жыл соңында шығарылады. Жаңа кәсіпорын 25 адамды тұрақты жұмыспен қамтиды.

Сонымен қатар, облыс аудандарында шикізат қабылдау пункттерін ашу жоспарланған. Бұл жергілікті халықты жұмыспен қамтуға мүмкіндік береді.

Жобаға тартылған инвестицияның жалпы көлемі - 5,2 млрд теңге.

Зауыт қуаты жылына - 2100 тонна. Жергілікті нарықтан бөлек, өнімдер Еуропаға экспортталады деп жоспарланған.