RUS
Ақтау қаласындағы жаңа институт Президент Қасым-Жомарт Тоқаевтың республикада шетелдік жетекші жоғары оқу орындарының филиалдарын ашу және өнеркәсіп инженерлерінің жаңа буынын қалыптастыру жөніндегі тапсырмасын орындау мақсатында құрылған. Сондай-ақ институт Ш. Есенов атындағы Каспий мемлекеттік технологиялар және инжиниринг университетінің базасында жүзеге асады.
ҚР Ғылым және жоғары білім министрлігінің хабарлауынша, жаңа оқу ордасының алғашқы студенттерін оқыту осы жылдың қыркүйек айында басталады. 2029 жылы "уақыт капсуласын" ашу мәртебесі алғашқы түлектердің еншісіне бұйырады. "Уақыт капсуласында" Әлихан Смайылов пен Франк-Вальтер Штайнмайердің жаңа университеттің алғашқы түлектеріне арнап жазған үндеу хаты бар.
Институттың кешенді оқу бағдарламасы Ш. Есенов атындағы университетте үш жыл және Германиядағы серіктес университетте бір жарым жыл оқу мерзімін қамтиды. Осыған байланысты жаңа ЖОО-да неміс тілін үйренуге көп көңіл бөлінетін болады. Сондай-ақ білім беру бағдарламасы болашақта 8 бакалавриат және 6 магистратура бағдарламаларына дейін кеңейтіледі деп жоспарланып отыр.
Германияның Федералды Президенті Франк-Вальтер Штайнмайер аталған шарада жоғары білікті инженерлерді даярлау қазақстандық және неміс компаниялары үшін де тиімді екенін атап өтіп, былай деп мәлімдеме жасады:
- Бүгінде екі елде де білікті мамандарға сұраныс жоғары. Мен осы институт пен оның түлектерінің болашағы жарқын болатынына сенімдімін. Бұл – білім саласындағы өте маңызды жоба. Екі ел арасындағы осы саладағы және ғылыми зерттеулер саласындағы ынтымақтастық одан әрі дами бермек. Осы жылдың қыркүйек айында оқудың сәтті басталуына тілектеспін, — дейді Франк-Вальтер Штайнмайер.
