RUS
2020-2021 жылдары Бурабай» МҰТП аумағында Қазақстан Республикасында баламасы жоқ бірегей Smart National Park Burabay жүйесі енгізілді. Түрлі құқық бұзушылықтардың алдын алатын жүйедегі тіркелген деректерді құқық қорғау органдары мен төтенше жағдай қызметтері пайдалана алады.
Сондай-ақ аталған жоба аясында Жедел басқару орталығы құрылып, сигналдық шамдары бар, биіктігі кемінде 30 метрлік 13 антенна-мачталық құрылым орнатылған. Онымен қоса, дала өрттерін ерте анықтау үшін тепловизормен жабдықталған 14 камера, қауіпсіздікті бақылайтын 29 камера қойылған.
Ал барлық бағана құрылымдар сыртқы қуат көздеріне тәуелді емес. 33 бірлік жел генераторымен 156 бірлік күн панелімен, сондай-ақ резервтік қуат үшін 13 бірлік дизельдік генератормен жабдықталған.
2021 жылдан бастап Smart National Park Burabay жүйесі іске қосылып, толыққан жұмыс басталғалы бері аймақта өрт шалу оқиғалары 4 есе қысқарған.
Жобаны іске асырушылардың айтуынша, «ақылды» жүйенің ІІІ кезеңі аясында биыл «Бурабай» МҰТП-да 5 бақылау-өткізу пунктінде ақы төлеуді автоматтандыру, Ұлттық парк аумағында өртті тез арада анықтау үшін қосымша 3 қондырғы орнату, қоршаған ортаны бақылау және талдау, көлдердегі браконьерлермен күресу үшін датчиктерді қою көзделіп отыр.