RUS
Босқынның Құранды өртеудегі негізгі мақсаты әлі түсініксіз, бірақ оның айтуынша, ол бұл ісімен Швецияға зиян тигізгісі келмейтін көрінеді.
Стокгольм полициясы апелляциялық соттың шешімінен кейін мұсылмандардың Құрбан айт мерекесінің басталуына сәйкес келетін акцияны өткізуге рұқсат берген. Әуелде полиция бұл іс қоғамдық араздықты тудыруы мүмкін деген қауіптен сескеніп, акцияны өткізуге рұқсат етпеген. Кейіннен ұйымдастырушылар сотқа жүгініп, екі аптадан соң акцияны өткізуге рұқсат алған.
Құрбай айт қарсаңында ұйымдастырылған акцияда Құранды өртеген 37 жастағы мұсылман Салван Момика есімді Ирак босқыны.
"Мен Стокгольмдегі Бас мешіттің алдында өз қарсылығымды көрсетіп, Құранға қатысты өз позициямды көрсеткім келеді. Мен кітапты жыртамын да, аяусыз өртеймін", - деген өтінішті мұсылман босқын полиция департаментіне жолдаған.
Еске сала кетсек, бұған дейін қаңтар айында Дания азаматы, әсіреоңшыл саясаткер, "Stram Kurs" антиислам партиясының лидері Расмус Палудан Түркия елшілігінің алдында Құран кітабын өртеп жіберген болатын. Ол кезде Швеция полициясы лидерге акция өткізуге рұқсат еткенмен, кітапты өртеуге рұқсат етілмегенін мәлімдеген. Жағдай Швециядағы және әлемдегі барша мұсылман қауымның ашуын тудырған резонанс болды.
Аталған жағдайдан соң Түркия президенті Режеп Тайып Ердоған Швецияның НАТО-ға кіру туралы өтінішіне қарсылық танытқан болатын. Құрбан айт мейрамындағы екінші акцияның салдары Швецияның НАТО-ға кіру өтінішін тағы да қанағаттандырмауы мүмкін.