RUS
Трамп бейсенбіде Reuters агенттігіне берген сұқбатта, Путин сәтсіз көтеріліс нәтижесінде "біршама әлсіреді", сондықтан Америка Құрама Штаттарының Ресей мен Украина арасындағы келіссөздер арқылы бейбіт келісім жасайтын уақыт келді деген мәлімдеме жасады.
"Мен бұл пайдасыз соғыста адам өлімі тоқтағанын қалаймын", - дейді Трамп.
Қазір республикалық партия бойынша президенттікке үміткерлер арасында АҚШ-тағы сауалнамаларда көш бастап тұрған Дональд Трамп соғысты тоқтату үшін Украина билігі жерінің бір бөлігін Ресейге беруі керек екенін жоққа шығармады.
Трамп егер өзі президент болса, келіссөздермен соғысты қалай да болмасын тоқтататынын айтты. Украинаға өз жерін беру керек десе де, өз жерін жанқиярлықпен қорғайтын украиндықтар "зор құрметке лайық" екенін қоса айтты.
"Менің ойымша, олар (Украина - ред.) осыған дейін қайтарып алған жерлерді өздеріне қалдыруға хақы бар, Ресей де бұған келісер еді. Жақсы келіссөз жүргізетін адам керек, ал қазір ол жоқ", - дейді Трамп Reuters агенттігіне сілтеме жасап.
"АҚШ-тың дәл қазір істеуі керек ең маңызды қадамы - екі тарапты біріктіріп, Ресей мен Украинаны татуластыру. Енді екі тарапты татуластыру арқылы бейбітшілікке қол жеткізетін уақыт келді", - дейді президенттікке үміткер Трамп.
Еске сала кетсек, Украина билігінің соғысты тоқтатуға бағытталған келіссөзде қойған шарты – Ресей әскері Украинаның халықаралық бекітілген жер аумағынан шығуы және оны мойындауы.
Ал Ресей тарапының келіссөздердегі шарты – басып алынған аумақтар Ресейдің бақылауында болуы керек және соған Украина билігі “көнуі” керек. Десе де, екі жақ әлі күнге дейін бітімге келе алмай отыр.