RUS
Оның ішінде 172-сі – қылмыстық теріс қылық. Заңсыз айналымнан барлығы 2,5 тонна есірткі заттары тәркіленді, деп хабарлайды smartnews.kz сайты.
Жамбыл облыстық Полиция департаменті есірткі қылмысына қарсы іс-қимыл басқармасының бастығы Әлім Бажықбаевтың айтуынша, республикалық айлық барысында жамбылдық полицейлер жергілікті атқарушы органдармен бірлесіп бірқатар профилактикалық іс-шаралар, соның ішінде спорттық, мәдени, қайырымдылық акциялары, семинарлар, кездесулер мен дәрістер өткізген. Соның бірі нашақорлыққа қарсы күрес айлығының аяқталуына байланысты 2 000-ға жуық адамның қатысуымен «Есірткісіз болашақ» акциясы Тараздағы Қ.Рысқұлбеков атындағы саябақта өтті.
Тараз қаласы әкімінің орынбасары Дәуір Дәулетов, Жамбыл облысы ПД Есірткі қылмысына қарсы іс-қимыл басқармасы бастығының орынбасары Дінмұхамбет Қойториев, қоғам белсенділері мен еріктілер қатысқан акцияда Д.Дәулетов полицейлерге нашақорлықпен күреске қосып жүрген елеулі үлесі үшін алғысын білдірді.
«Нашақорлықтың алдын алу және есірткінің заңсыз айналымына қарсы күрес – мемлекеттік саясаттың маңызды бағыттарының бірі. Айлық барысында полицейлер облыстық спорт, мәдениет, денсаулық сақтау, білім басқармаларының өкілдерімен, еріктілермен және үкіметтік емес ұйымдармен бірлесіп 298 іс-шара өткізді. Осындай кездесулер аудандарда да өтті», – деді Д.Қойториев.
Акция барысында айлыққа белсенді қатысқаны үшін бірқатар қызметкер Алғыс хатпен марапатталып, өздерінің кәсіби дағдыларын көрсеткен қойылымдар қойды. Жасөспірімдерге баскетбол, волейбол, тоғызқұмалақтан жарыстар ұйымдастырылып, полицейлер заңсыз айналымнан алынған есірткіні өртеп жіберді. Қала тұрғындары мен қонақтары үшін концерттік бағдарлама қойылып, балмұздақ таратылды.