RUS
Биылғы жылдың I тоқсанында еліміздегі халықтың орта есеппен жан басына шаққандағы атаулы ақшалай табыстары 168097 теңгені құраған. Былтырғы жылдың I тоқсанымен салыстырғанда 18,1% өскен. Десе де, тұтыну баға индексімен салыстырсақ, халықтың ақшалай табыстары нақты мәнде 1,6% төмендеген.
Өңірлер бойынша бір адамның ең көп табыс көлемі Атырау облысына тиесілі. Атырау облысында орташа есеппен жан басына шаққандағы атаулы табыс 359 662 мың теңге. Бұл табыс көрсеткіші орташа республикалық деңгейде басқа өңірлерден 2 есе көп ақша табады деген сөз.
Одан кейінгі орында Ұлытау облысы - 238 561 теңге, Алматы қаласы - 230 743, Астана қаласы - 226 196 теңге болса, ал Маңғыстау облысында 208 090 теңге. Қалған өңірлердегі табыс 200 мың теңгеге жетпейді. Мәселен елдегі ең төменгі табыс деңгейі Түркістан облысында анықталған. Түркістан облысындағы жан басына шаққандағы атаулы табыс 91 576 теңгені құрайды.
Халықтың жан басына шаққандағы атаулы ақшалай табыстарын есептеу жалпы шамасы жалдамалы жұмыстан, өз бетінше жұмыспен қамтылудан түскен табыстарды, ағымдағы төленген трансферттерді және өзге де ақшалай табыстарды жиынтықтау жолымен анықталады.