RUS
Оқиға 3 шілде күні «Маленький принц» жеке балабақшасында болды.
Әлеуметтік желіде тараған видеода баланың жол бойымен жүгіріп бара жатқаны анық көрінеді. Баланың анасы желіде жазғанындай, балдырғандар таңмен балабақша ауласында серуендеп жүрген. Тәрбиеші, медицина қызметкерлері балалармен бірге болған. Алайда олардың бірі көшеге шығып кеткенін байқамаған.
Абырой болғанда, жол бойымен жүгіріп бара жатқан баланы жүргізуші қыз ұстап алып, балабақшаға алып келген.
«Балабақша есігі ашық қалған ғой. Күзетші, балабақша меңгерушісі қайда қарап отыр?», - деп жазды баланың анасы.
Орал қаласы білім беру бөлімі оқиғаны растады.
«Маленький принц» жеке балабақшасында баланың қашып кету оқиғасы бойынша анықтау жұмыстары жүргізілді. Баланың қауіпсіздігін тиісті деңгейде қадағаламаған тәрбиеші 4 шілде күні жұмысынан шығып кетті. Бүгін білім беру бөлімінде балабақша директорларымен Полиция департаменті өкілдерінің қатысуымен балалардың қауіпсіздігін қамтамасыз ету, жазатайым оқиғалардың алдын алу бағытында арнайы жиналыс өткізілді», - деп хабарлады ведомстводан.