RUS
Шаруалар қазір киік көбейіп, ауыл шаруашылығына қауіп төндіре бастағанын айтып отыр. Ресейдің шекара маңындағы аудандарынан да Қазақстаннан киік өтіп кетті деген хабар түсіп жатыр. Жергілікті билік киіктен шеккен зиян үшін Қазақстан үкіметінен өтемақы өндіріп алғысы келеді.
Батыс Қазақстан облысының шаруалары үшінші жыл қатарынан киіктен зардап шегіп отырмыз деп шағынып жатыр. Кәсіпкерлер түз жануары жерді таптап, жайылымдық және шабындық жердің шөбін жеп кеткенін айтады.
Жәнібек ауданындағы шаруа қожалығының басшысы Шәміл Салахов мәселеге қатысты:
"Шөп оруды бастадым. Бірақ өз жерімде емес, өйткені онда шөп қалған жоқ, бәрін киік жеп, тып-типыл қылды. 7 мың гектар жерім бар. Әкімдік тағы 500 гектар берді, сол жердің шөбін орып жатырмын. Ол жақта сәл де болса шөп бар", – дейді.
Шаруа малына шөп-жем жеткізе алмай екі жылда ірі қара басын екі есе азайтуға мәжбүр болған. Әкімдік бөлген жердің шөбі қысқа жетпейді. Оның есебінше, бұл жерден сиырға қысқа қажет шөптен 1,5 есе аз қор ғана жиналады.