RUS
Бүгінгі сотқа жүзден аса адам жиналған. Сот шешімі бойынша, Әйгерім Тілеужан төрт жылға, Қалас Нұрпейісов сегіз жылға бас бостандығынан айырылды. Тағы үш қатысушы – Нұрлан Дәлібаев, Ермұхамет Шилібаев, Жанайдар Кәрменов – сегіз жылға бас бостандығынан айырылды. Бұған дейін прокурор Әйгерім Тілеужанға 5 жыл, қалғандарына 11 жыл беруді сұраған болатын.
Сотта барлық айыпталушылар әуежайды басып алуға қатысқандарын жоққа шығарды.
"Біз әуежайда (наразылық кезінде) болдық, бірақ ол жерге әртүрлі жерлерден адамдар жиналды. Мен ол жерге ешкімді апарған жоқпын, (наразылықтарға қатысу үшін) баруға ешкімді мәжбүрлеген жоқпын", — деді Қалас Нұрпейісов.
Ал Әйгерім Тілеужан өз кезегінде сотта журналист және белсенді ретінде тәртіпсіздіктер кезінде әуежайға барғанын айтты.
Тергеу мәліметтері бойынша, айыпталушы деп танылған Тілеужан мен Нұрпейісов “Алматыдағы әуежай аумағында жаппай тәртіпсіздіктер ұйымдастырды” делінген.
Сондай-ақ, айыптау қорытындысында Қалас Нұрпейісов пен тағы үш адам "ғимараттарға шабуыл жасады" және "машиналарды тартып алып, басқалардың мүлкін ұрлады" деп жазылған.
Еске сала кетсек, 2022 жылдың қаңтарында бүкіл Қазақстан бойынша наразылық митингілері өтті. Әуелде Жаңаөзен тұрғындары газ бағасының өсуіне қарсы бейбіт шерулерді бастады. Артынша үкіметке қарсы демонстрациялар тәртіпсіздік пен қауіпсіздік күштері арасындағы қақтығысқа ұласты. Қазақстанның бірнеше қаласында әкімшілік ғимараттар мен мемлекеттік мекемелер басып алса, ал Алматыда наразылық білдірушілер әуежайды басып алды.
Ресми мәліметтерге сәйкес, Қаңтар оқиғасы кезінде 238 адам қаза тапқан.