Белсенді Әйгерім Тілеужан тергеу изоляторынан хат жолдады

Айыпталушы Әйгерім Тілеужанның көпшілікке қарата жазылған хатын журналист Данияр Молдабеков әлеуметтік желілерде жариялады. 

«Сотқа келіп, қолдау көрсеткендерге алғыс айтамын. Танитын да, танымайтын да адамдар болды. Келіспеушіліктерге қарамастан, бәрі келіп, бізбен бірге болды. Осы үшін өз халқымды мақтан тұтамын, әрі жақсы көремін. Көңілдеріңізді қалдырмаймын. Біз соңына дейін күресеміз: апелляция, Жоғарғы Сот, БҰҰ. Қамауда отырсам да, Берік Асыловпен (Бас прокурор) соттасуды тоқтатпаймын. Мен үшін алаңдамаңыздар. Менде бәрі жақсы. Ең бастысы, шындық біздің жағымызда. Бәріңізді жақсы көремін, сүйдім», - делінген Әйгерім Тілеужанның жазған хатында.

Еске сала кетсек, 11 шілде күні Алматыда Қаңтар оқиғасы кезінде «әуежайды басып алу ісі» бойынша сот үкімі шықты.

Бұған дейін белсенділерге «Қаңтар оқиғасы кезінде стратегиялық объектілерге шабуыл жасап, мүлікті бүлдірді, жаппай тәртіпсіздіктерге қатысты» деген айып тағылған болатын.

Сот айыпталушыларды кінәлі деп танып, журналист Әйгерім Тілеужанды 4 жылға, ал Қалас Нұрпейісов, Нұрлан Дәлібаев, Ермұхамбет Шилібаев және Жанайдар Кәрменовті 8 жылға бас бостандығынан айырылды.