RUS
Shell Eco Marathon Asia-Pacific and the Middle East 2023 халықаралық студенттік инженерлік командалар біріншілігіне еліміздің инженер студенттері барған болатын. Жарысқа Азия-Тынық мұхиты аймағы мен Таяу Шығыс елдерінің 80-нен астам университет командалары қатысқан. Қазақстандық студенттер 1 кВт/сағ электр батареялы энергиямен 261,1 км жол жүрген модульдік бөлшектелетін автокөлік құрастырып шыққан.
«SU Racing Team» командасының Қытай, Филиппин, Индонезиядан келген командаларға тежеу механизмін орнату, реттеу және техникалық тексеруден өтуге көмектесуінің нәтижесінде «SU Racing Team» командасы Spirit of Shell Eco-marathon Award Winner жүлдесімен марапатталған. Аталған марапат жарысқа қатысқан командалардың бір-біріне өзара көмек көрсеткені үшін берілетін награда. Қазақстаннан барған студенттердің арқасында жоғарыда аталған елдердің командалары техникалық байқаудан өтіп, жарысқа қатысуды жалғастыра алды, сөйтіп жарыс жолына шықты.
«SU Racing Тeam» командасының капитаны Әлібек Ибраим жарысқа қатысты өз әсерін бөлісті.
– Соңғы үш күн үміт пен үрейге толы болды, әлемнің түкпір-түкпірінен ең мықты командалар жиналды, олар – технологияны әзірлеу, сатып алу және пайдалану үшін «космостық» қаржы жұмсаған ең күшті командалар. Аз ғана уақыт ішінде біз нағыз сенімді машина құрастыра алғанымызға және әділ қазылар көптеген қатысушылар арасынан біздің команданың жұмысына жоғары баға бергеніне мен өте қуаныштымын, – дейді команда капитаны.