RUS
Атырау облыс прокуроры Бауыржан Жұмақановтың төрағалығымен заңдылықты, құқықтық тәртіпті және қылмыскерлікке қарсы күресті қамтамасыз ету жөніндегі үйлестіру кеңесінің отырысы өтті.
Онда құқық қорғау және жергілікті атқарушы органдардың қылмыстың алдын алу бойынша өзара іс-қимылының тиімділігі, шешу жолы талқыланды.
Облыс прокуроры Бауыржан Жұмақановтың мәліметінше, биылғы 6 айда қылмыс 5%-ға өсумен сипатталып отыр.
Оның ішінде кісі өлтіру 55%, жол-көлік оқиғасы 35%, бұзақылық 32%, алаяқтық 27%, интернет-алаяқтық 44% өскен.
«Балалар қылмысы 48% өсті. Бұл – алаңдатарлық факт. Өйткені, балалар – біздің болашағымыз. Жасөспірімдердің тәрбиесі мен араласатын ортасы тек ата-аналардың ғана емес, әсіресе білім беру, денсаулық сақтау және полиция органдарының назарында болуы керек. Кәмелетке толмағандар арасындағы қылмыстың өсуіне байланысты ювеналды қызметтердің жұмысын ұйымдастыруды қайта қарау қажет», -деді Бауыржан Жұмақанов.
Оның дерегіне сүйенсек, өңірде жол-көлік оқиғаларынан өлім-жітім 35% өскен. Ал, әр түрлі дене жарақатын алғандар саны 7% өсіп отыр.
«Күн сайын дерлік жол-көлік оқиғалары тіркеледі. Соның салдарынан мерт болғандар да бар. Сондықтан полиция қызметкерлеріне көлік қозғалысын жіті патрульдеуді күшейтуді ұсынамыз», -деп мәлім етті Бауырдан Жұмақанов.
Облыс прокуроры тиісті органдар назарына қылмыстың алдын алу үшін бірнеше бағытты ұсынды.
Бұл – алкогольді заңсыз сатумен, есірткі құралдарының заңсыз айналымымен күресті жандандыру, балалар мен жасөспірімдердің өмірі мен денсаулығының қауіпсіздігін қамтамасыз ету жөніндегі жұмысты күшейту, өңірдегі криминогендік жағдайды тұрақтандыруға мүмкіндік беретін жұмысты жаңа форматқа ауыстыру.
«Қазір – формальдылықтан бас тартып, нақты нәтижеге қол жеткізуге баса назар аударатын кезең. Осы орайда профилактикалық іс-шараларды өткізуге түбегейлі жаңа көзқарас қажет», -деді облыс прокуроры.