Қарағандыда 10 тұрғын үйдің құрылысы тоқтатылды
Қарағандыда сот шешімімен 10 тұрғын үй кешенінің құрылысы тоқтатылды. Бұл туралы smartnews.kz сайты хабарлайды.
Құрылыстың тоқтауына себеп – салушылар рұқсат құжаттарынсыз жұмысқа кіріскен. Оны жоспардан тыс тексеру кезінде МСҚБ басқармасы анықтады.
Жөнсіз құрылыс салушылар мониторинг барысында, Қарағанды қаласының сәулет және қала құрылысы бөлімімен анықталған.
– Деректер бізге берілген соң, 10 компанияға жоспардан тыс тексеру жүргізіп, бұзушылықтар туралы сотқа шағым түсірдік. Құрылыс салушылар ҚР ӘҚБтК-нің 314 "Жобалық құжаттамасыз құрылыс", 321 "Авторлық-техникалық қадағалаусыз құрылыс жүргізу" және 463 “МСҚБ талон-хабарламасысыз құрылыс жүргізу" баптары бойынша әкімшілік жауапкершілікке тартылды. Барлығына айыппұл салынды, – дейді Мемлекеттік құрылыс инспекторы Думан Қасымжанов.
Рұқсатсыз құрылыс салушылар тізіміне келесі компаниялар кірген:
- "T-K Building" ЖШС ("Al-Farabi" ТК);
- "TT INVEST-2022" ЖШС ("Хан" ТК);
- "Satti Lux Stroy" ЖШС ("Нұра" ТК);
- "Baiterek-2022" ЖШС ("Аманат" ТК);
- "СМК Group" ЖШС ("Baiterek" ТК);
- "Григорян Ш. Н." ЖК (КТ);
- "TBL building" ЖШС ("Tole Bi 2" КТ);
- "Revival Alliance" ЖШС (Ержанов к-сі, 63/2);
- "ККК Бетон" ЖШС ("Бақытты отбасы" ТК);
- "Optima-Stroy" ЖШС ("Династия" ТК).
Егер басқарма ескертуі қаралмаса, нысан пайдалануға жіберілмей, қабылдау актісін алмайтын болады.