Жалпы жүлде қоры 16 млн теңге: әдеби сыйлыққа өтінім қабылдау аяқталды

Елімізде тұңғыш рет жас жазушылар мен ақындарға берілетін арнаулы әдеби сыйлықта әр жеңімпаз үшін 4 млн теңге сыйақы берілмек. 18-35 жас аралығындағы қаламгерлерге арналған әдеби сыйлыққа өтінім беру аяқталған.
 
Министрліктің берген ақпаратына сәйкес, байқауға барлығы 53 үміткердің құжаты қабылданған. Олардың ішінде 17 қатысушы – «Балалар әдебиеті» номинациясына, 9  – «Драматургия» номинациясына, 13 – «Поэзия» номинациясына, 14 қатысушы – «Проза» номинациясы бойынша өтінім берген.
 
Қазіргі таңда барлық шығармалар сараптаманың бірінші кезеңінде, яғни әдеби сыйлықтың эксперттер комиссиясының қарауына ұсынылған. Туындылар эксперттердің қарауына авторы жасырынып, шифр бойынша таратылған. Яғни эксперттер тек шығарманы бағалайтын болады.
 
Сараптаманың екінші кезеңі тамыз айының екінші жартысына жоспарланып отыр. Әдеби сыйлық негізгі 4 номинация бойынша үздіктерді анықтайды. Әр номинацияда жеңімпазға 4 млн теңге сыйақы және «Арнаулы әдеби сыйлықтың лауреаты» атағы, диплом және төсбелгі беріледі.
Жеңімпаздарды марапаттау жыл соңына жоспарланған.
 
«Жас қаламгерлердің шығармашылығын қолдау, ынталандыру және насихаттау аса маңызды. Тұңғыш рет ұйымдастырылып отырған сыйлықты еліміздің рухани ортасы жылы қабылдады. Салыстырмалы тұрғыда басқа номинацияларға қарағанда «Балалар әдебиеті» бағытына көбірек шығарма түскені негізгі мақсаттарымыздың біріне қол жеткізгеніміз деуге болады. Бүгін жас қаламгерлерге жасалған қолдау, ертең үлкен жазушылардың қалыптасуына септігін тигізетіні анық»,- деді ҚР МСМ Архив, құжаттама және кітап ісі комитеті Кітап ісі басқармасының басшысы Алмаз Мырзахмет.