RUS
Алматы қалалық ТЖД бастығының міндетін атқарушы полковник Ерлан Әлібеков «Ақкент» тұрғын үй кешеніндегі алапат өрт кезінде қаза тапқан Әсел Бекмұхаметова терезеден секірмей, шамамен 20 секунд күткен жағдайда мүмкін аман қалар еді деп пікір білдірді.
«Оның терезеден секіргені белгілі болды. Алайда, біздің бөлімшелер ол кезде 5-ші қабатқа жеткен болатын. Егер ол шамамен 20 секунд күткенде біздің өрт сөндірушілер есікті өздері ашып, оны аман алып қалар еді. Өрт сөндірушілер үйге кірген сәтте оның анасын көріп, оны эвакуациялады, сөйтіп құтқарып қалды. Ал Әсел ол кезде секіріп кеткен еді», - дейді Ерлан Әлібеков.
Еске сала кетсек, Алматыда 16 қабатты үйде өрт тұтанған болатын. Қызыл жалын сағат 18:46 кезінде оқшауланып, сөндірілген. 31 адам, оның ішінде 16 бала ауруханаға жеткізілді.
Амалы қалмаған тұрғындар балаларын терезеден лақтырды. Зардап шеккендердің ішінде 2 жүкті әйел болған.
Кейін Алматы қалалық денсаулық сақтау басқармасы бір адамның қазақ болғанын хабарлады. Әсел Бекмұхаметованың отбасына қажетті көмек көрсетіледі. Марқұмды жерлеу рәсімі Алматы облысы Еңбекшіқазақ ауданы Қаражота ауылында өтеді. Алматы облысының әкімдігі жерлеу рәсімін ұйымдастыруға, марқұмның денесін тасымалдауға жәрдем береді.
Қазіргі уақытта өрттен зардап шеккен тұрғындар тамақ және жатын орынмен қамтамасыз етілген.