Алматыда Q-net қаржы пирамидасын басқарған айыпталушыларға қатысты тергеу аяқталды
ҚМА Алматыдағы департаменті «Q-net» қаржылық пирамидасының құрылымдық бөлімшелерін басқарғанға қатысты тергеуді аяқтады. Бұл туралы smartnews.kz сайты хабарлайды.
«Q-net» қаржылық пирамидасының құрылымдық бөлімшелерін басқарғандарға қатысты тергеу барысында іс бойынша 5 айыпталушы анықталған. Олар 2018 жылдың қарашасынан 2022 жылға дейін «Q-net» қаржы пирамидасының Алматыдағы филиалдарын басқарған.
Олар сол уақыт аралығында пирамиданың қызметіне 45 салымшы тартып, оларға 75 млн теңге материалдық шығын келтірген.
Қазіргі таңда аталған 5 тұлғаға қатысты тергеу аяқталып, сотқа жолданған.
Тергеу барысында 27,7 млн теңге сомасына мүлік қамауға алынды.
- Қаржы пирамидаларын құру қылмыстық жауапкершілікке әкеп соғатынын және мүлкін тәркілеумен 10 жылға дейін бас бостандығынан айыру түріндегі жазаны қарастыратынын ескертеміз, - дейді Қаржы мониторинг агенттігінің ресми өкілі.