RUS
SMARTNEWS.KZ басылымының хабарлауынша, Ақтауда дауыл кезінде аялдама құлап, салдарынан екі адам зардап шекті. Бұл туралы Астана ТВ жаңалықтар қызметі жеткізді.
Ақтаудағы дауылдың қатты болғаны сонша қаладағы темір аялдама екі адамның үстіне құлап кеткен. Әлеуметтік желіде тараған видеодан әйел мен ер адамның темір қоршаудың үстінде жатқанын көруге болады. Оқиға орнына жедел жәрдем қызметі келіп, жарақат алғандарды дереу ауруханаға жеткізген. Темірдің астында қалған әйелдің бірнеше қабырғасы сынып, тағы бір ер адамның қолы сынған.
3 адам жедел жәрдем бөлмесіне жеткізілді. Екеуі де қаладан. Үшінші зардап шегуші Құрық ауылындағы әскери бөлімінде.
52 жастағы әйел адамның 8 қабырғасы сынған. Қабырға сынғаннан өкпе қуысында ауа жиналып қалған. Сол ауаны шығару мақсатында дренаж қойылады. Соған байланысты хирургияға жатады. Жағдайы орташа ауырлықта, - деді Маңғыстау облыстық ауруханасы қабылдау бөлімінің меңгерушісі.
Адамдардың үстіне құлаған аялдаманың сапасыз құрылысына қатысты қылмыстық іс қозғалып та үлгерген. Құрылысқа жауапты «Алматы Құрылыс» компаниясына қарасты жергілікті филиалдың басшысы аялдама инженерлік желілерді жөндеуге байланысты сонау шілде айында бөлшектелгенін айтады.
Енді компания басшылығы зардап шеккен адамдарға барып, жағдайларын сұрамақ. Сондай-ақ, компания өкілі зардап шеккендерге материалдық көмек көрсетілетінін айтты.
Әрине, кінәміз бар, қазір барамыз, бәрін анықтаймыз. Жоқ, әрине, сол қауіпсіздікті алдын ала қамтамасыз етуіміз керек еді. Бірақ көрдіңіз бе, ол Достық үйінің аумағында тұрған, қоршалған аялдама еді. Сіз ол жерге адам барып тұрады деп ойламайсыз. Әйел сол жерге барып, дауылдан жасырынғысы келген. Ал аялдама бір орында тұрып, құлап қалды, – деді «Алматы Құрылыс» АҚ жұмыстар филиалының директоры Сәкен Бердібаев.
Қазір Ақтау көшелерінде жүру аса қауіпті. Желден үйлер мен ғимараттардың шатыры ұшып жатыр. Ағаштар мен бағаналар құлап, көліктерге зақым келген. Тіпті дүлей дауылдың кесірінен электр стансалары істен шығып, қаланың тең жартысы жарықсыз қалған. Бағдаршамның жұмыс істемеуі салдарынан көлік қозғалысы да қиындады. Сондықтан төтеншеліктер тұрғындарды далаға шықпауға кеңес береді.
Маңғыстау облысы тұрғындарына ғимараттардан шықпауға, яғни көліктерін талдардың астына қоймауға, балаларды қараусыз қалдырмауға және осындай төтенше жағдайлар болған кезде 112 және 101 телефон нөміріне хабарласуыңызды сұрайды. Бұл дауыл үш күнге дейін жалғасады. Сондықтан қауіпсіздік шараларын мұқият сақтауға шақырамын, - деді Маңғыстау облысы ТЖД ресми өкілі Ерлан Сұлтанмұратов.
Ал өңірдің білім басқармасы ауа райының қолайсыздығына байланысты Қарақия ауданында оқушылар қашықтан оқуға жіберілгенін хабарлады. Ал Ақтау мектептерінде екінші ауысымдағы сабақтар 30 минутқа дейін қысқартылған.
Синоптиктердің болжауынша, ертең де жел күшейеді.