Оралда мүгедек бала асыраушы аналардың пәтер алуға берген өтініштері жойылған

Egov.press Telegram арнасында жария болған бейнежазбада плакат ұстаған бірнеше әйел пәтерге қатысты дау көтерді.

Олардың айтуынша, бір жыл бұрын ипотека алу бойынша конкурста арнайы бағдарламаға іліккенмен, биыл өтініштері жойылғаны жөнінде хабарлама келген. Мүгедек балалардың аналары өтініштің не үшін жойылғанын сұрағанмен, банк дұрыс ақпарат бермеген. Аналардың кейбірі тіпті 13 жылдан бері үкіметтен берілетін тегін үй кезегінен де үй ала алмай жүр.

— 2009 жылдан бері кезекте тұрмыз. Балаларымыз мүгедек, 2 топта. Енді үкіметтен берілетін үй берілмей жатыр. «Бақытты отбасы» деген конкурсқа қатысып, сол конкурстан 2022 жылы өттік. Енді бір жыл болды күткенімізге. Бізге кеше хабарлама келді, Отбасы банкінен. Өтініш жойылды деген. Ол неліктен жойылады? Бұл мүгедек балалардың сонда үйлері қашан беріледі? Бұл жойылады деген хабар бізге түсініксіз, - дейді аналардың бірі.

Банк бұл жағдайға аналарға мардымды жауап бермеген.

— Отбасы банктің менеджерлерінен сұрап жатырмыз. Бізге ешқандай толық жауап беріп жатқан жоқ. Дұрыс ақпарат таратып жатқан жоқ. Сонда бұл мүмкіндігі шектеулі балаларға қоғамнан көмек қалай болады? Қашан беріледі бұл үйлер? Біз ата-аналары тегін емес, ақшасын төлейміз ғой, - деп талап қойды мүмкіндігі шектеулі балалардың аналары.

Бұл жағдайға қатысты әзірге банк тарапынан ресми жауап жоқ.