RUS
Оның пікірінше, баспана мәселесі тұрғындардың бас ауруына айналған.
Әсіресе, соңғы жылдары мәселе күрт шиеленісті. Баспана мәселесін Мәжіліс мінберінен бірнеше рет көтердік. Үкімет тарапынан мардымды жауап болмады. Маған үнемі сырғытпа жауап келді. Бүгінде баспана нарығы тұралап тұр. Үй алудың барлық бағдарламасы тоқырауға ұшырады. «7-20-25» бағдарламасы жемқорлықтың ордасына айналып жатыр. Бағдарлама арқылы үй алу үшін пара берушілер де көбеюде, - деді Дәулет Мұқаев.
Осыған байланысты ол өз сөзін дәлелдеуге тырысты.
«Бүгін «7-20-25» бағдарламасына лимит ашылды. Ол 5 минутта бітті де қалды. Оқырмандардан «Бұл не деген сұмдық?» деген хаттар келіп жатыр. «Менен банк менеджері 1 млн 400 мың сұрады», «Менен 700 мың теңге сұрады» деп жазылған хаттар келіп жатыр. Бұл қашан тоқтайды?» - деді депутат.
Сондай-ақ ол жастарға арналған мемлекеттік бағдарламаның маңызы артып жатқанын жеткізді.
Президент «Отбасы банктің» қызметін қайта қарауды тапсырып, облыс орталықтарына емес, аудандарға, моноқалаларға және ауылдарға басымдық беру керек деген еді. Өзгеріс қашан болады? Қашан халыққа тиімді, қолжетімді бағдарлама іске қосылады? - деді Дәулет Мұқаев.
Өнеркәсіп және құрылыс министрі Қанат Шарлапаев өзекті сұрақтарға бірден толық жауап бере алмайтынын ашық айтты.
Мұндай үлкен мәселеге бірден жауап бере алмаймын. Бірақ сізге бірнеше фактіні айтайын. Мысалы, 2023 жылға мемлекет 10 мың пәтер берді. Оған 105 млрд теңге бөлінді.
2024 жылға жоспарымыз бар. Екінші мәселе, президенттің тапсырмасы бойынша өткен жылы жалға алуды жеңілдету үшін субсидиялау бағдарламасы іске асырылды. Тағы басқа бағдарлама бойынша мемлекет қаражат бөліп жатыр. Бірақ сіз өзіңіз білесіз, барлық халықты баспанамен қамтамасыз ету оңай емес. Егер сізде уақыт болса, бірге отырып, барлық бағдарламаны бірге қарайық», - деді министр.